航哥力求衛冕打吡　優才搵神蘇幫拖

葉楚航去年憑「大至尊」攻下四歲系列尾關香港打吡大賽，今年則派出「優才」出戰這項大賽，力求衛冕。「優才」係今年打吡參戰馬當中，唯一賽駒曾經喺香港贏過2000米，航哥對旗下愛駒充滿信心：「馬匹狀態好好，尋日拍跳完，預計下星期一會再落草地快跳。」

而「優才」喺下星期日預計會配上蘇銘倫出戰打吡，葉楚航透露因為艾兆禮上仗跑經典盃時發揮普通，加上馬主希望搵一個有多啲大賽經驗嘅騎師，所以決定換人，他說：「上場沿途走得畀我預想中前，隻馬搶咗口，早段用多咗力，導致最後失利。而我哋同馬主商量完之後，決定換上蘇銘倫，騎者表示應該無問題，但就有啲關於護照嘅事情需要處理。」練者另表示希望抽到中內檔，屆時守喺3-4位，暫時未搵後備騎師。