賽前一日仍快跳　搏殺鏡頭話曬畀你知

由於今朝有7組谷閘關係，不少練馬師都索性直接過海督操，惟有3駒出試的方嘉柏卻早於5時15分現身沙田晨課，並在烽火台對出隧道斜路徘徊良久，煞有介事咁款，未幾即見數匹柏廐馬分別由助手魚貫駛至，其中一駒為昨午才由從化運返的「話你知」(第7場)，正是明日柏廐明日沙田賽事的參戰馬之一，而小方對此駒也格外關注，瞪大雙眼向鞍上人交帶操練指示，鏡頭令人側目。

其後，「話你知」由助手於大圈進行快跳800米，走來相當生猛，賽前一日仍做快工夫，動態極罕，可見馬匹弗到漏油，期間見小方偕同兒子Ronan在欄邊金睛火眼吼到實，課後再走到馬房彎冇雷公咁遠接馬，備戰空前積極。須知「話你知」上場早段搶口，以致末段無以為繼，看來馬昆韁繩唔太適合，今戰改配地頭蟲班德禮，續爭首本草地1600米，係時候還盅！