策騎基地移至香港？麥道朗咁答……

麥道朗雖然喺3月下旬於杜拜世界盃賽日上陣時唔太好彩，先有網上影片影到佢畀杜拜美丹馬場保安截住，擾攘一輪先獲放行，跟住之後麥道朗手風就唔太順，「嫡愛心」陣上發生意外，「知足常樂」敬陪末席，而「浪漫勇士」再次飲恨，有時運氣嘅嘢真係好難講。

不過麥道朗亦好快重整旗鼓，剛周六(4月12日)喺澳洲蘭域馬場騎「精緻之道」(Via Sistina)同埋「狂迷女孩」(Fangirl)兩奪一級賽。昨日(4月14日)麥道朗接受澳洲傳媒訪問，期間分享自己未來幾個月嘅行程。騎者透露，今個月底當然會來香港出戰冠軍賽馬日，之後有機會到澳洲布里斯班出戰大賽，6月將會前往英國出戰皇家雅士谷賽期，騎者希望可以成功索騎1至2駒。

關於麥道朗，相信唔少人都好關心佢會否策騎基地轉至香港，畢竟佢喺香港依家叫座力強嘛！但麥道朗表示現時無意轉換策騎基地，雖然依家要舟車勞頓，但都可以接受，而且仲可以照顧埋兩個囡囡添！