艾道拿停賽　潘一哥接手梗係快搏

今期跑馬地夜賽，四哥艾道拿被罰停賽一日，而佢之前支持度甚好，亦有唔少坐騎，但就因為今晚停賽無緣效力，而且今期有2駒仲要畀潘頓接手，一陣贏埋爆樽就真係大件事！

其中第5場四班1650米，黎廐4歲新兵「卓越蒨鋒」出賽11次，上仗終於轉至谷草出爭，結果即在艾道拿胯下以半個馬位輕勝，馬兒取得服役首場頭馬。既然「卓越蒨鋒」可於跑馬地贏馬，練者當然把握機會乘勝追擊，不過今次艾道拿停賽，練者都搵嚟潘頓壓陣，當然係眾矢之的。

另外第8場四班1200米，賀賢馬房「快搏」三班已見接近走勢，前仗重返四班後亦用黃寶妮減10磅上陣跑第6，上仗艾道拿接手出戰同程賽事，自8檔出閘後沿途留後，喺直路亦都受困，最後姍姍來遲跑入第5名。今次艾道拿停賽，潘頓同「快搏」故劍重逢，若然克服到11檔，當然係呢場爭勝分子之一。