體重回升30磅　回師強項食頭胡！

徐雨石啱啱禮拜日沙田賽事憑「前風」及「暴風小子」起孖，依家累積12場頭馬，護級形勢都算樂觀。嚟到今晚跑馬地賽事，石哥梗係想乘勝追擊，角逐頭場五班谷草1000米嘅9歲馬「中華威威」，今次重返強項兼起用贏馬拍檔田泰安，絕對不能忽視。

雖然9歲高齡，但「中華威威」今季認真犀利，先後喺五班同四班贏過谷草1000米，戰鬥力未退化，當然加至50分後漸漸吃力，然後開始減分，剛戰終於落到五班跑泥地1200米，但體重由前次嘅1255磅跌至1226磅，結果一放了事只跑第9名。復課後有正常操練工夫，埋門亦由田泰安跳咗一課，今次體重回升30磅，接近今季嘅贏馬體重，兼且得2檔之助，不乏變身條件，值得重視。