【戰況R3】丁冠豪差1W畢業　閃光燈季內再跑爭分

第3場開出大熱Q，丁冠豪馬房「閃光燈」今仗初次增程跑1400米，依然被捧成2.4倍大熱門，結果喺潘頓胯下順利勝出，而丁廄尚欠1W就合格上岸。今場跑第2名為艾兆禮「同心同樂」，串成4.6倍大熱連贏。奧爾民「豐辰」後上第3，第4名為周俊樂「小皇爺」。

賽後，丁冠豪話本身「閃光燈」係畀班德禮跑，但騎者揀咗今日停賽，所以轉交潘頓執韁。「閃光燈」贏首W時，已經覺得隻馬1400米會好過1200米，但佢想隻馬多啲出賽經驗後先至增程，而佢覺得上場開始落慢腳，所以今場跑1400米，隻馬都需要啲時間撻，咁啱今場撞正弱組，終於取得第2W。「閃光燈」贏馬後會升上三班，季內仍會繼續作戰，因為馬匹進度來得唔錯，加上健康冇大問題，所以唔怕繼續出戰。

第3場賽果：1-2-11-12

二重彩賽果：1-2(最後賠率9.6)