【戰況R6】小橋流水高金沛　新貴兩戰兩勝捧埋盃！

「小橋流水」昔日贏盡短途大賽，更曾遠征英國捧走金禧錦標，馬主高金沛養馬運真係好好，到依家高生又有好馬接棒喇，名下「小鳥天堂」一出即勝後，今日第2次上陣熱到2.6倍，藉快步速之助直路霍宏聲在外欄狂追，又以近2馬位之先到終點，唔止為高生捧走香港傷健策騎協會50週年盃，仲幫丁仔今日起孖贏夠14場，今季成功畢業喇~跑第2、3名，則為內欄竄上的「海藍寶」及連場入圍的「快樂高球」。

丁冠豪表示「小鳥天堂」上場放頭贏馬用多咗力，賽前試閘刻意教留後，雖然馬匹陣上仍然稚嫩，不過進步幅度大，加上第2段步速快幫到手，結果今場可克服檔位贏馬，相信此駒以文靜方式策騎表現更佳。而今場終可達標上岸，丁冠豪寄望頭馬可陸續有來。

第6場賽果：2-11-1-6

二重彩賽果：2-11(最後賠率20)