【混合過關】兆文：雅典武士淡定吸引

第7場「雅典武士」出戰同程谷草1200米演出準繩，更曾締1分9秒04佳速，上仗熱倒因體重急跌，原本上周強配出擊，卻被儀仗馬踢親退出，翌日立即跳番冇大礙，周一再跳更淡淡定唔急唔搶，吸引到不得了。「電氣騎士」上季準得交關，且一再跑出快時間，前速銳利，7檔一心搶放反而更好。「舞林密碼」上仗抖得唔夠敗不作準，細粒仔叉足電威力勁，加埋眼罩充滿新鮮感。

第8場「喜蓮勇感」首3戰獲冠亞季各一，之後改攻田草再添1冠1亞，3歲已光芒四射，今季必可再上，有望進軍4歲馬經典賽事系列，晨課喜見更淡定收放自如，今戰孭輕磅勝望壓一。「同舟共濟」今次賽前試夠兩課大閘，9月9日試短途閘跟前勝出，吸引到爆！「包裝智威」仍舊重口，但相比以往已收斂，依然進步之馬一哩合適，另一爭勝要角。