【混合過關】兆文：撼天鐵翼渾身是勁

第1場「鑽飾翱翔」26分馬當然唔叻，但假假地贏過4場頭馬，當中3場在同程取得，落在今戰弱組孭超輕磅極有利，更吸引埋門同「伊臣」拍跳不落下風，被追過之後再反先，展現久違的好鬥心。「中華威威」季初45及40分贏馬，縱戰力已減退，照計打個七折都有着數，上周六單跳走勢爽勁觀感亦好。「快樂奇兵」落到五班演出穩定，周一出跳專注唔急唔搶，且毛色悅目金光閃閃。

第4場「撼天鐵翼」近兩仗劣勢追近並不失禮，現時評分仍佔優勢，置身今戰弱組形勢大好，上周二試閘出圈後扭計，但之後出試有前有後走勢出色，睇埋周一戴眼罩出跳渾身是勁，確認托弗。

「友愛心得」性格乖巧，晨課快慢由人，前仗贏馬表現出色，上仗檔差未動食指，今仗5檔可入二疊甚至貼欄。「電源之駒」轉廖廐迅即建功，勝後再試閘勇銳無比，巴度接手時來運到。