【娛子醬】香港歷代「驚」奇女神！包你睇到眼都凸
20180524
東網電視
更多新聞短片
講到晒Body，點少得佢哋幾位！
踏入炎炎夏日，眾女星出席活動嗰時，勢必把握機會大騷誘人身材，實行有幾少布得幾少布，幫自己散熱之餘，又可以幫Fans消消暑喎，話咁易就一舉兩得，何樂而不為呢？不過講到晒Body搏出位，薑就梗係愈老愈辣啦，今次盤點「驚奇女神」，重溫佢哋嘅「得意之作」，包保令大家睇完一見難忘﹗
李華月
打頭陣嘅就梗係90年代嘅著名三級片女星李華月啦，雖然佢嗰樣就唔係咁出眾，不過佢勝在自信心十足，仲係喺咁多位脫星之中，唯一一個敢「真槍實彈」、挺起「導彈胸」拍床上戲嘅女星，佢先後拍過《滿清禁宮奇案》、《人肉叉燒包—八仙飯店》、《虐之戀》等，加加埋埋接近成20套嘅三級電影。
其中喺1995年，李華月就自資拍三級片《血戀》，當時以假戲真做嚟做公開招募男主角嘅超筍條件，引起一鼓熱烈報名潮！同年拍港版《花花公子》四點盡露寫真集，貼地到去上環文武廟取景，超重口味到連行過嘅師奶都對佢嘴藐藐添！不過李華月依家就已經淡出娛樂圈，唔知佢有冇意重出江湖，為一眾期待已久嘅傾慕者抹抹鼻血！
彭丹
大台出產好多唔同大大細細嘅「咪神」，例如有高海寧、歐陽巧瑩、陳婉衡等，不過要鬥都一定鬥唔過36F嘅「不倒胸波神」彭丹！講起彭丹，大家第一時間都一定係諗起《獎門人》，當年佢以拍得住「譚仔阿姐」唔鹹唔淡嘅廣東話，兼「E字馬」（一字馬）、拱橋等高難度動作，成功破格突出「入屋」，受盡一眾網民、嘉賓嘅恥笑做歡迎，不過彭丹一啲都唔介意，大方騷出「魔鬼濕柴」（魔鬼身材）娛樂大眾。
同時彭丹亦打破「波大冇腦」傳統，16歲去美國深造舞蹈同電影表演嘅佢，成績優秀，成為首位拎全額獎學金嘅華裔女學生，睇到呢度，係咪已經「驚」訝到擘大口得個窿？其實佢仲係唯一連獲美國華裔、美國中國、美國亞裔三冠小姐﹗但彭丹甘願捨棄女神光環，退下線喺內地從政兼做導演，好難再欣賞到佢副「魔鬼濕柴」啦！
李莉莉
數到有「阿伯殺手」之稱、獲選澳門小姐季軍嘅艷星李莉莉的「驚」典之作，莫過於佢喺1984年出道嗰時就已經拋胸賣肉，拍冷氣廣告仲大唱主題曲《我要你每夜陪住我》，用呻吟語氣不停叫「我要」勁洗腦，齋聽聲唔睇仲以為嗰廣告係打晒格仔，叫人一「聽」難忘！
李莉莉又睇中自己嘅三級片片迷係「阿伯級」男士，喺1995年出寫真嗰陣專登搵嚟一個80歲嘅阿伯做Model又攬又錫，另類狂咀搏宣傳！仲有佢次次出活動都鍾意玩百變形象，唔計招牌造型「胸圍內褲」着出面，有次佢出席首映仲搞Gimmick「露胸露毛」，喺三點位置黐住「胸」、「毛」貼紙。面對一籮籮負評，李莉莉依舊我行我素，有次出席完慈善活動，喺街見到有燈柱就突然「柱女」上身，攬柱表演「黃狗射尿」，搏出位程度令記者大感「黑人問號」。
陳綺明
有唔少明星、藝人間唔中都會一時失手春光乍洩，但講到露得最離奇就真係非陳綺明莫屬！相信佢當年咁「罕見」嘅露點事件，就真係前無古人，後來無者，至今都仍然歷歷在目。佢喺1992年獲亞姐小姐「完美體態」、「最上鏡小姐」而入行，好快就受到關注，喺1996年電台水運會，佢以一件頭白色高衩泳衣亮相，一出場就艷光四射，引死在場唔少工作人員﹗
而當日佢參加女子自由式50米初賽，雖然以第5名完成比賽，不過就因為佢喺池邊影相「賣大包」露出左邊乳頭，足足露咗5分鐘都唔知情，成功搶Focus！直到有工作人員話畀佢聽出事，佢先喊晒口話蝕底咗，仲「賴地硬」話冇人同過佢講，但實情就係一早就有記者通水畀佢聽，係佢借聾耳陳對耳咁冇離反應，掛住擺Pose，最後睇怕佢都知衰，惟有苦苦哀求記者唔好出露點相，但一切都已經太遲，走光相仲有得喺旺角信和賣，價值3蚊張，有價有市㗎都！
艾美琦
有邊位女藝人唔係「愛靚唔愛命」？跟住落嚟介紹嘅艷星艾美琦就係唔要命「始祖」，鏡頭前嘅佢從來都唔介意坦誠為咗變靚而走去韓國整容，變樣、隆胸樣樣做齊，成功上位引到記者去報道，不過現實往往都係天意弄人，整鼻失敗變歪，搞到佢心灰意冷要再去台灣「重建」，又咁啱撞正地震，艾美琦事後都自嘲話自己喺逃生嗰時，都唔知顧得嗰鼻嚟定自身安全好，真係陷入人生交叉點！
好彩識諗嘅佢最後都係顧住自身安全，安全返嚟香港，拆咗線仲畀人讚係「翻版黃翠如」添！如果唔係，以後就未必再有機會睇到佢啲「坦蕩蕩」、谷胸谷到上喉嚨「定」嘅寫真啦﹗
伍慧珊
曾效力大台足足16年嘅伍慧珊，一直都被埋沒D奶身材做埋晒啲妹仔角色，一離開「溫室」就梗係有幾豪放得幾豪放！佢早年出席電影《幼兒怨》嘅拍攝嗰時，以前、後中間S形兼真空透視裝「硬撼」G奶崔碧珈，東、西半球加埋若隱若現嘅三角敏感位成功博到攝記不停喪影，冷落身邊嘅崔碧珈，而當佢郁動擺Pose嗰時仲「大贈送」露毛，雖然佢就搏到盡，但出嚟美唔美觀就真係見仁見智！
不過好彩佢都自信心爆棚，懶理評論，又講到曾經喺馬來西亞拍嘢嗰時着C字底褲，熱得濟流汗甩出嚟，搞到勁尷尬，所以就把心一橫除埋底褲唔着，可能伍慧珊呢個唔着底褲散熱法，夏天出街大踏步都零舍爽過人呀！
村奈津子
無論香港女星有幾多走光搏上位嘅招數都好，點多都一定都多唔過「表表者」日本女優！就好似村奈津子，當年1998年，亞視為咗贏大台收視，請咗佢同另外5個同樣上圍驚人嘅「東瀛肉女」嚟香港出席記招，着住超辣三點式泳衣見記者。
而佢就懷疑掛住大幅度咁擺自認為誘人Pose，搞到上身件泳衣扣甩咗，成個Bra好似子彈咁快速飛出﹗睇到現場成村人眼都凸，企隔籬嗰個男公關仲懶醒咁，英雄救美咁即刻除件褸遮住村奈津子嗰心口，點知村奈津子就貫徹日本人特性「有錯就要耷低頭認」，錯過咗同男公關件褸相遇嘅好機會，而個男公關又反應唔切，搞到件褸就笠住咗村奈津子嗰頭度，當眾出醜！
之後村奈津子都即刻同所有人「耍冧」講好對唔住，真係唔知佢專登飛Bra定真係意外，亦唔知笑好定同情佢好。最終亞視雖然搶贏大台收視，但就收到十幾宗投訴，為表歉意仲要出道歉聲明，講到之後再出活動就會派乳貼畀佢哋喎！
章小蕙
前B嫂章小蕙和鍾鎮濤離婚後變得更豪放，為瞓身進軍娛樂圈，唔理係一仔一女之母嘅身份，着黑色SM褺衣，拎住條長鞭走去三級片，同時亦係「時裝達人鼻祖」嘅佢，曾有句金句就係「飯唔可以唔食，但衫唔可以唔買」，所以人前人後必着最貴、最靚嘅衫見人，順便大晒佢堅挺無比嘅湯碗胸，兼彰顯佢嘅時裝品味。
不過有時要出位，唔使吓吓一定賣肉露胸嘅。嗰次章小蕙出席宣傳活動遲大到，為咗平息傳媒嘅怒火，梗係諗吓奇招畀記者朋友交功課啦，智慧與美貎並重嘅佢，突然當眾除外套露t裇，唔好以為無嘢睇喎，皆因佢件t裇內有乾坤，喺無戴胸圍下有凸點功能，完美發揮何為密實中帶性感，如嫌露得未夠多都唔使慌，佢再嚟招晒肚腩橙皮紋，將吸睛程度大大提升，章小蕙又再次出位大成功。
----------------------------
東網巨星開咗ig喇，大家快啲follow啦！