【娛子醬】「華女郎」回顧！邊一對最經典？
20180627
東網電視
更多新聞短片
唔知邊個係你心水？
講到被封為「子華神」嘅黃子華，佢份人幽默又有性格，再加上佢嘅學識，每次喺佢嘅棟篤笑騷，都帶畀觀眾無數嘅共鳴，話中有話又夠貼地，深受大家愛戴，係「神中之神」！不過除咗棟篤笑騷，佢拍攝嘅作品，都一樣精彩絕倫，佢嘅作品每每都叫好叫座，而佢合作過多個嘅最佳女搭擋，都令人留下深刻印象，絕對係大家嘅集體回憶！依家就同大家嚟個最令人難忘嘅五個「華女郎」大回顧！
《男親女愛》鄭裕玲
話明最佳女搭擋，又點可以唔提同佢一樣都係神級嘅鄭裕玲（嘟嘟）呢？2000年時，佢哋合作無綫長劇《男親女愛》，至今大家仍然不斷重溫都係咁愛咁愛咁愛咁愛......。當中做法律行政人員「余樂天」一角嘅子華，同做律師「Miss Mo」嘅嘟嘟，劇中兩個有唔少經典對白，包括「各位，『尊嚴』呢樣嘢已經跑輸大市，依家『粗鹽』都貴過『尊嚴』」、「一個男人點都會hurt過一、兩個女人，但作為一個女人一世未被男人hurt過，咁就系真正嘅hurt啦！」、「你同我OFF啦！」同「乜都輸得，係信心唔輸得！」當中佢哋互相鬥嘴火花程度爆晒燈，睇到觀眾笑爆嘴！即使相隔18年，唔少觀眾仍然希望二人能夠再度 「 合體」拍劇！
《棟篤神探》蔡少芬
如果提到子華合作嘅女搭擋，最令觀眾催淚嘅一定係蔡少芬（Ada），皆因佢哋喺2004年合作嘅無綫劇 《棟篤神探》，一個做無厘頭幹探，一個就做神經質嘅保險從事員，兩個合作嘅化學效果同樣令觀眾喜愛，當年亦引起一番追看熱潮！劇中兩個最終有情人终成眷属 ，大結局仲講到佢哋影婚紗相，但因子華途中捉賊導致哮喘發作暈倒街頭，生死未卜，另一邊Ada就密密等待子華，呢一幕簡直令唔少觀眾用咗好多紙巾，真係喊到 「我真的受傷了 」！之後好多劇迷仲投訴不滿《棟》劇結局安排，要補拍一個Happy ending版先得，所以話子華同Ada喺觀眾心目中有幾咁大威力呢！
《絕代商驕》佘詩曼
同樣擦出唔少火花嘅女搭擋，仲有佘詩曼（阿佘）！阿佘同子華喺2009年合作嘅無綫劇《絕代商驕》，做收數妹「淼淼」嘅阿佘同做商業奇才「麥提爽」嘅子華，由歡喜冤家變成惺惺相惜，最令人難以忘記，當然要數子華嘅紅格仔襯衫加個垃圾袋外套打扮，仲有佢扮演「港女」性格嘅阿佘唇槍舌劍，都為人津津樂道！當年佢哋帶起咗個樹窿潮，劇中佢哋不時喺樹窿吐出心事嘅場口，夠晒經典！二人亦被封為「最佳CP」之一，直至相隔10年，二人再度「 合體」拍賀歲片，票房大賣，成為賀歲片冠軍，仲話二人即使相隔多年冇合作，但係默契程度有增無減，絕對係冇得輸！
《My盛Lady》徐子珊
子華多啲作品通常都會出好多金句，佢喺2013年拍攝無綫劇《My盛Lady》，就以盛女現象為題材，當中飾演「 盛女救星」嘅子華，同全新拍擋徐子珊合作擦出新驚喜。劇中不乏子珊要放低自己形象色誘子華嘅場口，仲有唔少搞笑嘅「床戲」，而鮮有做喜劇嘅子珊，同子華擦出另類火花，仲被網民封佢為子華嘅「最有新鮮感」女拍檔！
《前度》陳法拉
除咗電視經典女搭擋，喺舞台劇上嘅搭擋不得不提就係陳法拉。佢哋喺2016年合作舞台劇《前度》，兩個分別飾演一對相愛而無法一齊嘅男女，探討喺社會唔同階層價值觀上嘅矛盾。法拉同子華合作火花四濺，其中一場兩個互相喺價值觀上嘅分歧爭辯，兩個之間嘅張力令人驚喜，令人拍案叫絕！據知，原來當初法拉推卻邀請，仲要子華等4年先有空參與，難怪被子華指佢係「最有性格女拍檔」！