【娛子醬】靚女又有實力！你最想邊位花旦回巢拍劇？
20190221
東網電視
更多新聞短片
無綫人才輩出，每一代當家花旦都各有特色，雖然有啲退出幕前，有啲就轉戰內地發展，但佢哋拍過嘅劇集至今仍為人津津樂道，絕對係實力派演員，難怪令人忘不了！
吳美珩
女星吳美珩自從2007年離巢後，專心做少奶奶照顧家庭。曾喺無綫拍過30部劇集嘅佢，以《開心賓館》、《愛情全保》同《女人唔易做》為人熟悉，當中《女》劇中嘅「高志玲」一角絕對係佢嘅代表作，加上其氣質非凡，即使退出幕前多年，仍Keep得相當好！早前佢出席與鄭裕玲嘅聚會，令網民都期望可喺幕前再見呢位仙氣花旦。
佘詩曼
貴為首位雙料視后嘅佘詩曼（阿佘），拍過無數經典角色，佢喺2014年嘅《使徒行者》中經歷三位養母同時離別嘅一幕，發揮出「神級」演技，令佢再登視后寶座。不過阿佘喺2016年決定離開「娘家」，並成立工作室喺內地發展。去年佢憑內地劇《延禧攻略》嘅「嫻妃」再創事業高峰，現時都係喺內地發展為主。
陳法拉
「甜美女神」陳法拉喺無綫參與嘅劇集向來有收視保證，不論《潛行狙擊》、《衝上雲霄II》和《溏心風暴之家好月圓》同樣有高收視。不過2013年，佢約滿無綫離巢，更返美國修讀戲劇表演碩士，期間佢有同黃子華合作舞台劇《前度》及出席活動，惟鮮有喺幕前演出。
鄧萃雯
好戲之人鄧萃雯嘅演技無庸置疑，不論係《金枝慾孽》嘅「如妃」、《巾幗梟雄》嘅「四奶奶」定係《女人唔易做》嘅「海翹」都深入民心，睇到觀眾拍爛手掌！佢喺2013年拍畢《金枝慾孽貳》後同樣轉戰內地，更表示現時對劇本角色要求更高，唔係輕易拍劇，令大家都好想再睇佢精湛嘅演技。
張可頤
為千禧年代當家花旦之一嘅張可頤，多年嚟都擔正做女一，無論古裝劇同時裝劇都一樣做得揮灑自如，相信大家一定唔會忘記《金枝慾孽》嘅「安茜」、《女人最痛》嘅「沙宛淇」、《婚前昏後》嘅「孫慶家」、《茶是故鄉濃》嘅「盤妹雅」等角色。張可頤係《萬千星輝頒獎典禮》最佳女主角五強嘅常客，近年佢主力拍攝電影為主，鮮有喺「公仔箱」出現。
郭可盈
闊別幕前10年嘅郭可盈，同樣係唔少觀眾心目中喜愛花旦之一。佢自2009年後誕下囡囡津津後，就以家庭為重並退出幕前。之前佢都講過依家都放晒心機喺女兒度，未有意復出，所以大家都只可留意可盈喺網上嘅動向。