功夫茶：冬蟲夏草含砒霜　補身隨時變傷身

今時今日黑心食品無奇不有，只有估唔到，沒有做唔到。有人話未嘗遍所有化學元素，唔可以自稱為中國人，真係一啲都冇誇張。

最不可思議嘅係，普通食品固然靠唔住，連貴似黃金嘅冬蟲夏草都有問題。呢，內地當局最近檢驗冬蟲夏草產品，發現砷含量普遍超標，每公斤最高達九點九毫克，比保健食品國家安全標準超標近九倍，都咪話唔誇張。正如專家話齋，砷分為可吸收及不可吸收兩類，可吸收嘅砷即係俗稱嘅砒霜，長期食用可能造成過量攝入，積聚體內有機會導致皮膚癌同黑腳病，補身隨時變成傷身，唔驚就假。

有人可能覺得奇怪，冬蟲夏草一般生長於海拔四千至七千米高嘅地方，環境唔會受重金屬污染，點解砷含量會爆晒燈呢？答案好簡單，又係奸商好事多為。係人都知，冬蟲夏草被奉為「聖藥」，有提升細胞免疫功能同食療養生功效，由於近年產量大減，上等冬蟲夏草閒閒地每両售價過萬元，比黃金更值錢，素有「藥黃金」美譽。因為有價有市咯喎，奸商財迷心竅，咪從中做手腳，冇毒變有毒囉。

業內人士踢爆，部分人工培植嘅冬蟲夏草，所用嘅「營養包」可能污染初生孢子，令砷超標；最無良嘅係，有啲奸商唔止喺蟲草混入泥土或鐵枝增加重量，而且索性將蟲草浸金屬水甚至注射金屬液，由於外表無任何分別，連業界人士都分辨唔到，普通消費者更加矇查查。食咗呢啲「加料」嘅蟲草，無療效事小，傷害身體事大，分分鐘變「鋼鐵俠」都似。

所以話，今時今日無物不假，無食不毒，砒霜蟲草只係冰山一角咋。遠嘅唔講，最近揭發嘅問題食品已經多不勝數，毒瑤柱、毒海味、化學豉油、工業鹽、工業醋、毒茶葉等等，家陣連蟲草都出事，真係五花八門，無奇不有。咪以為香港可以獨善其身吖，內地及台灣嘅食品都靠唔住，香港又點可能例外吖，尤其係食安官僚後知後覺，把關形同虛設，次次都要等到出事至補鑊，更加令人難以放心。大家有眼見，無論係蘇丹紅、孔雀石綠、三聚氰胺，或者係坑渠油、塑化劑、過期肉，香港邊次可以幸免吖？邊次唔係搞到一鑊泡吖？

最離譜嘅係，香港食安條例幾十年如一日，唔止遠遠落後於國際標準，有啲甚至比第三世界更不如，唔出事至奇喇。

講到底，求人不如求己。旨意港府把關，不如自求多福好過，特別係農曆新年期間，飲食更加要小心，否則，一個唔好彩病從口入，咁就幾難龍馬精神過猴年咯。