功夫茶:假難民攻陷西九 切毒瘤拖到幾時

20170402
東網電視
更多新聞短片

假難民兵團喺香港姦淫擄掠無惡不作,三日唔埋兩日就爆大鑊,搞到市民雞毛鴨血,呢啲早就唔係新聞,但大家又知唔知邊度係假難民罪案嘅重災區?冇錯喇,之唔係重慶大廈所在嘅西九龍囉!

數字冇花冇假。警方日前披露過去三年非華裔人士因干犯刑事罪行被捕人數,舊年達四千七百名,較一四年勁升一成五,其中包括油尖、旺角、深水埗以及九龍城嘅西九龍總區,被捕人數更加係全港之冠,達一千八百人之多。最得人驚嘅係,非華裔因涉扒竊、藏有攻擊性武器同非禮等罪行而被捕嘅人數持續增加,市民簡直有得震冇得瞓。

話時話,假難民罪案爆不停,西九特別係油尖旺淪為九反之地,並非一朝一夕嘅事。呢,又係重慶大廈,尋晚凌晨就發生南亞女掃帚狂毆持行街紙非洲女事件。再早少少有南亞鐵錘獨行賊扑爆珠寶店櫥窗擸走巨鑽,又係發生喺尖沙咀;仲有舊年一批南亞同鄉深夜喺佐敦開大片,最終搞到要警員開槍制止……類似罪案多到天光都數唔晒,區內街坊人心惶惶,怨聲載道,有人甚至買佢哋怕,考慮搬屋添。

講真,假難民罪案遍地開花,絕對唔止肆虐西九咁簡單,除非移民嘅啫,否則搬到天腳底都冇用,市民唯一可以做嘅,睇怕只有學似元朗居民咁,恭請咸豐年代嘅「更練團」重出江湖咯。

假難民搞到香港七國咁亂不特止,公帑仲要不斷泵水供養呢班瘟神,市民簡直冤過竇娥。淨係今個財政年度,涉及處理假難民免遣返聲請嘅開支就高達十四億港元,主要用喺入境處增加人手處理相關個案,同埋安排公費法律支援上面。大家睇到喇,人蛇來港後只要舉手聲請免遣返,之後用公帑打官司,拖個三年五載完全唔係問題,期間打黑工食大茶飯替黑幫賣命,財源滾滾,分分鐘好搵過喺家鄉做醫生律師,唔仆到嚟就笨喇。

功夫茶講到口水都乾嘞,解決假難民問題,治本之道在於切斷人蛇來港誘因,除咗退出聯合國難民公約,實行即捕即解,最簡單可行莫過於重設禁閉式難民營。可惜你有你講,官老爺睬你都傻,對於重設難民營,保安局局長黎棟國例牌大耍官腔,話政府收到有關意見,正進行整體研究喎。唔使問阿貴,又係將爛攤子留畀下屆政府喇!

冇計喇,夕陽政府進入倒數階段,班高官一個二個hea做等收工,連整唔見選民資料咁大件事都可以側側膊唔多覺,其他正經嘢更加唔使旨意有人理。切除假難民問題呢個治安大毒瘤,市民唔通只能寄望新官上任?