功夫茶：大學勁刮文革風　校長心灰爭逃亡

有人話，唔到香港，唔知文革仲搞緊，真係一啲都冇講錯。唔信嘅，去大學校園走一圈，睇吓班大學生有幾惡咪知囉，唔係冷血冒犯高官，就係惡言詛咒校長，再唔係就詆毀老師「舐共」，咁搞法，師長戴上高帽畀紅衞兵批倒批臭嘅一幕，怕且好快喺香港重演咯。

唔係講笑，校園亂象由開學到家陣都未停過，嶺南大學尋日又有學生發起遊行，要求校方三日內譴責捲入失言風波嘅校董何君堯，否則唔排除衝擊及佔領校園，問你死未。仲有喎，理大因為嚴格禁止港獨，校長唐偉章慘成眾矢之的，被大學生喺民主牆貼上黑白相詛咒身亡，心腸黑過墨汁，毒過毒蛇，想唔話班大學生讀屎片都唔得吖。

唔知係咪心淡喇，唐偉章向全校師生發出電郵，宣布明年任期屆滿後將會掛冠而去，不再連任。有人計過，十位有份聯署反港獨聲明嘅大學校長之中，計埋唐偉章已有四位下堂求去，包括港大馬斐森、中大沈祖堯同科大陳繁昌。堂堂大學校長，社會地位崇高，人工更係唔嘢小，竟然紛紛劈炮唔撈，當然唔係咁啱得咁蹺，份工有幾惡啃，學生有幾難頂，心照喇。

鬼咩，近年政治入侵校園，學生被無良政客洗腦，醉心街頭，加上部分教師不務正業，誤人子弟，搞到學生開口「違法達義」，埋口「勇武抗爭」，家陣仲衰到學人搞港獨，激起社會同北大人反感，大學校長冇辦法再扮鴕鳥，惟有出手遏止，點知咁就得罪咗班大帝，幾乎日日被學生批鬥臭罵，大學校長左右做人難，唔意興闌珊就假，仲唔走得快好世界咩。

話時話，學生逼走校長呢股歪風都唔係始自今日咯，只係於今尤烈咁解啫，好似回歸冇耐嘅港大民調風波，間接將校長鄭耀宗逼走；又好似徐立之，將港大搞到有聲有色，結果因為總理李克強訪港嘅保安問題，被學生鬧到體無完膚，最終又係黯然離去。至於「港獨橋頭堡」中大呢排立立亂，校長沈祖堯唔止備受外界批評，仲被學生指罵為「政治傀儡」添，同佔中爆發之初，沈校長讚揚學生「為天地立心、為生民立命、為萬世開太平」，受盡學生吹捧形成鮮明對比。有人話慈母多敗兒，校長終於自食惡果，唔係冇道理㗎。

講到尾，納稅人每年出咁多錢資助大學生讀書，無非想為社會作育英才，而唔係想教出一班數典忘祖嘅怪獸。大學校長就話大不了唔撈啫，香港教育失敗先至最大鑊，港府再唔徹底清算佔中，何止校園亂象沒完沒了，整個社會都不得安寧吖！