功夫茶：公幹費冠絕亞洲　競爭力還剩幾何

香港近年樣樣大倒退，瓣瓣搞唔掂，各種國際排名每況愈下，好嘞，香港終於威番次，稱霸亞洲喇！不過呢個第一就未必係好事，事關喺香港嘅公幹費用冠絕全亞洲城市，呢種殊榮真係唔要好過要囉。

有機構尋日就發表調查報告，研究一百個亞洲城市嘅酒店住宿、膳食、飲品、洗衣支出同埋的士費用，結果發現喺香港嘅公幹使費係最重皮嘅，平均每日要使逾五百美元即係約三千九百幾港元至搞得掂，都咪話唔乸脷呀，連出名物價指數高嘅日本東京都唔係香港嗰皮，由上年嘅第一被逼到落第二位。雖然話，香港公幹使費距離全球第一嘅紐約仲有一段距離，之但係以今時今日香港物價騰飛嘅速度，玩吓手唔使幾耐就追到同紐約睇齊啦。

好簡單，大公司派員嚟香港公幹，使費高咗，利潤就少咗，以後搵商機做生意都唔會再優先揀嚟香港啦，咁香港點同其他城市競爭吖。你話嘞，財雄勢大嘅跨國公司都牙痛咁聲，大嗌頂唔順，喺香港生活嘅小市民就日日被迫硬食，望住沒有最貴、只有更貴嘅物價，何止苦不堪言，直情係有冤無路訴。

唔使講咩，淨係講香港嘅樓價已經「癲」出國際，連續八年成為全球最難負擔城市，市民唔食唔飲十九年，先可以買到樓，仲要係轉個身都難嘅蝸居，排第二、三嘅澳洲悉尼同加拿大溫哥華根本望塵莫及。曾有港府官員話喎，樓價高證明香港經濟好，呢種咪堅離地、不食人間煙火嘅言論囉。係呀，喺投資者或炒樓客眼中，樓價愈升，意味住食水愈深，但無殼蝸牛就慘囉，樓價癲處未算癲，想有瓦遮頭咪即係比登天仲難？

喺香港唔止住屋貴，而係百物騰貴，「衣食住行皆不易，生老病死樣樣難」就係咁解。呢，房委會率先公屋加租，基層已經嘈到拆天，點知領展就更狼死，屋邨停車場加租一成二，一個車位月租二千幾，居然仲貴過公屋租金，直情飛擒大咬咁滯。仲有喎，每年賺逾百億嘅港鐵又要加價嘞，其他交通機構難免有樣學樣，小市民百上加斤，唔通以後行路返工、返學咩。

你話吖，香港政治環境已經十分之惡劣，物價又高處未算高，市民慘極仲有得再慘，基層哀歌唱不完，唔怪得連小五學生作文都大發感慨頂唔順香港啲物價。家陣香港再掀起移民潮，經濟比香港差嘅台灣，甚至飛鳥難渡嘅太平洋島國瓦努阿圖一樣照殺，其中一大原因就係物價平過香港，如果唔係又有邊個想離鄉別井喎。