功夫茶：天網恢恢疏不漏　作惡多端終有報

「忙忙如喪家之犬，急急如漏網之魚」，用嚟形容陷入窮途末路嘅黑幫和勝和前坐館泰國大毒梟「上海仔」郭永鴻就貼切不過嘞。事關呢條友仔詐病潛逃東窗事發，香港警方已向佢發出通緝令，而隨住內地掃黑除惡利劍指向香港以至其他東南亞國家，橫行一時嘅上海仔淪為死魚死狗，就算匿到天涯海角都躲唔過法網。

係人都知，上海仔有兩案四罪在身，當中嘅洗黑錢案，原定上月初須向警方報到，殊不知佢搵律師交張醫生紙，訛稱喺泰國中風就玩失蹤，警方當然唔會中計，日前正式發出通緝令，只要上海仔一入境就會被捕。仲有喎，佢另外牽涉嘅串謀刑事恐嚇、串謀蓄意傷人及串謀勒索三宗罪，亦隨住佢冇如期續保，同樣被警方通緝，呢啲咪叫多行不義必自斃囉。

出得嚟行，遲早要還，上海仔黃賭毒黑樣樣齊，惡貫滿盈，畀天收只係遲早問題咋。最好笑係條友呢頭話中風，嗰頭就現身泰國、柬埔寨，行得走得，家陣仲去咗尼泊爾添，乜中風有咁好精神嘅咩？再講吖，以前包庇佢嘅黑警自身難保，泰國及柬埔寨嘅販毒集團頭目為免受拖累紛紛同佢劃清界線，冇保護傘撐腰咯喎，仲惡得出樣咩。

話時話，上海仔點解會去尼泊爾着草呢？唔通貪嗰度空氣好？非也，原因係泰國、柬埔寨同中國有引渡協議，尼泊爾就冇。之但係佢冇諗過呢三個地方都係國際刑警組織成員國，只要本港發出「紅色通緝令」，佢根本無所遁形，仲未計中央堅決掃黑除惡，公安部部長趙克志唔止將掃黑利劍指向粵港澳，近日更出訪緬甸、老撾同上海仔匿藏過嘅柬埔寨，證明掃黑無疆界。嗱，近日香港警方連同內地展開「雷霆18」行動，和勝和成為狙擊目標，十九日內已被掃咗八宗毒品大案，上海仔爪牙相繼落網，擺明要一鋪打殘上海仔喇。

講起上海仔嘅滔天罪行，真係三日三夜都講唔完，淨係佢一手招攬嘅南亞兵團，搞到香港雞犬不寧，已經人神共憤。最Cheap係佢年前僱用南亞兵團貼街招勒索城中富豪不果，家陣索性連錢都慳番，學外逃嘅內地富商郭文貴玩網上「爆料」，自編自導自演敲詐抹黑，胡言亂語梗係破綻百出。老實講，一個犯案纍纍、誠信破產、稱病潛逃嘅黑幫頭子，為咗逃避司法制裁，有咩壞事做唔出？有咩故事編唔出？連郭文貴都早已收皮，死剩把口嘅上海仔，末日就快到嘞。

都係嗰句喇，避得過初一，避唔過十五。上海仔咁多宗罪在身，保護傘又統統冚旗，橫死掂死，倒不如速速自首，死得乾脆吖！