功夫茶:睇到報道先知驚 薪高糧準勁低能

20180621
東網電視
更多新聞短片

開講有話,一件污,兩件穢,三件冇所謂。好似港鐵沙中線工程咁吖,質量醜聞井噴式大爆發,鑊鑊新鮮鑊鑊甘,之但係港府高官依然冇乜所謂,傳媒狂轟又好,議員鬧爆也罷,一樣好官我自為之。面皮厚成咁,唔到你唔服。

呢嗱,尋日運房局局長陳帆出席立法會會議,一如所料成為箭靶,建制派同反對派一致狂鬧,質疑港府監管港鐵不力,要求陳帆問責。不過以陳局長爐火純青嘅卸膊神功,三兩下手腳就將責任推得一乾二淨。佢老哥話喎,每有事故發生,港府都係從新聞報道先至得悉,對此「深表遺憾」,又話港鐵喺通報方面「的而且確係令人感到非常失望」,已敦促港鐵加強監管。至於係咪要問責下台,佢就話自有公論,當務之急係搞番掂筆蘇州屎先喎。

真係唔聽猶自可,一聽把幾火。冇錯,港鐵作為沙中線工程嘅管理人,知情不報,瞞報漏報,梗係責無旁貸喇,但運房局及路政署作為監管部門,對港鐵放任自流,一樣難辭其咎嘅咋。唔係咩,由承建商到港鐵再到港府,大家都好似講個「信」字就算,承建商話冇問題,港鐵深信不疑;港鐵話冇問題,港府又係「你辦事我放心」。無王管咯喎,唔亂象叢生、瞞上欺下至奇喇。

最好笑係,陳局長月薪高達三十幾萬,竟然好似路人甲咁,乜都唔知情,乜都係睇報紙至知,叫人見識乜嘢叫高薪低能。佢老哥仲好意思指摘港鐵冇通報,監管失效,但對自己嘅失職就提都唔提,有口話人冇口話自己。喂,連日來傳媒輕易挖到料爆,淨係尋日咋,又踢爆會展站兩年前有兩幅由鋼筋紮成嘅石屎連續牆被承建商「前後倒轉」安裝,隨時承受唔到泥土壓力,港府放棄主動監管,出咗事又扮晒懵然不知,話唔係廢柴都唔得喇。

當然喇,港府高官有鑊就卸、有事就閃已經係常態,唔使問責吖嘛,「官到無求膽自大」吖嘛,吹佢哋唔脹吖嘛。咪畀功夫茶批中,家陣港府又係玩拖字訣,乜都話等獨立調查委員會調查,乜都話等港鐵交報告,到有調查結果都係半年後,過咗海就係神仙咯。好彩嘅就搵個人祭旗,好似當年高鐵嚴重延誤超支,話就話港鐵洋總裁提前走人,實際上係袋袋平安;無良嘅就索性賴係制度嘅錯,無人需要上身,鉛水事件已係經典例子。

所以話啫,港府靠得住,豬乸會上樹。基建變豆腐渣工程淨係冰山一角咋,其他經濟民生嘢一樣瓣瓣唔掂,香港不斷沉淪,難怪有人慨嘆,香港回歸回成咁,到底有咩意義!