功夫茶：律政司錯漏百出　怪不得法治沉淪

港鐵沙中線沉降醜聞鑊鑊新鮮鑊鑊甘，七百萬港人有得震冇得瞓。一滴水睇穿整個世界，廢官僚無監無管，沙中線「站站沉降」，何嘗唔係律政司錯漏百出，成個香港「法治沉淪」嘅縮影呢。

話說高院就小學女教師懷疑以手機洩露入學試題一案頒下判詞，指出律政司理解錯誤，認為唔應該控以「不誠實取用電腦」罪名。據聞律政司因應判決，已經即時叫停同類案件。咁就弊嘞，事關嗰啲偷拍裙底春又或者偷影人沖涼如廁嘅衰人，好可能乘機翻案，變相等於「放狼歸山」，仲成世界嘅！

有法律界人士建議當局亡羊補牢，參考外國做法，制訂專屬法例檢控偷拍裙底嘅案件，唔該律政司咪再扮盲。話時話，關於「不誠實取用電腦」嘅爭議，唔係今時今日嘅事，連法律改革委員會都提出過質疑，如果官老爺一早醒水，主動補鑊，就唔使搞成今日咁喇。

不過嘥氣啦，律政司做嘢求求其其，甩漏多多，市民早就見怪不怪。呢，早排有單財務詐騙案，律政司竟然向刑責較重、涉及放高利貸同洗黑錢嘅被告發出免予起訴書，反而煮重其他輕罪被告嘅米，結果被法官譴責「醜陋」、「大晒」，唔到你唔服。

針對檢控質素每況愈下，有人歸咎律政司慳水慳力，將案件外判畀未夠班嘅新紮律師。即係咁，有啲人未夠班就梗嘞，係咪詐傻扮懵，係咪有不可告人嘅政治目的，同樣不可不防。之前一批參與違法佔旺嘅人士被控藐視法庭，結果因為律政司冇跟規矩喺十四日內提交聆訊日期通知書，法庭被迫終止聆訊，被告逍遙法外。又好似漢奸黎嗰單黑金醜聞案咁，律政司先以案件「證據太多」為由，大玩拖字訣；後來又話「證據不足」乾脆放生。神又係佢，鬼又係佢，被譏為「法治精神分裂」在所不惜，話唔係包庇縱奸，三歲細路都唔信。

至於講到律政司玩包庇咯喎，不得不提東方報業集團記者被漢奸黎刑事恐嚇一案。成單嘢有圖有片，鐵證如山，點知律政司拖拉超過一年，至今仍如泥牛入海，悄無聲息。最離譜嘅係，東方多番去信要求律政司澄清檢控有冇雙重標準，對方官話廢話連篇，來來去去三幅被，後來賴到冇嘢好賴，連「諮詢法律意見」嘅藉口都噏得出。咪玩啦，堂堂特區政府法律權威，居然話要再諮詢，呢啲咪「欲放之生，何患無詞」囉！

冇計喇，百年養不足，一日毀有餘。香港回歸廿一年，優勢買少見少，競爭力蕩然無存，廉潔精神一去不返，如果連法治之都嘅招牌都冇埋，咁就真係冚得旗咯！