功夫茶:交匯處污染爆燈 廢官僚一味靠拖

20181013
東網電視
更多新聞短片

港府風災善後不力,高官一味賴皮,話唔介意市民搵佢嚟出氣。嗱,「出氣」就免嘞,真係有誠意嘅,不妨走出舒適嘅官邸同辦公室,接吓地氣,吸吓廢氣,睇佢仲有冇咁口響!

環保署日前公布運輸署轄下六十四個有蓋交通交匯處空氣質素調查,發現九個巴士站二氧化氮水平超標,重災區嘅藍田、沙田及灣景巴士站更加超標一倍,其中藍田站交通交匯處一小時平均錄得六百幾微克二氧化氮,超標最少嘅馬鞍山市中心公共交通總站亦達到三百幾微克,市民喺呢啲交匯處等巴士,直頭同走入毒氣室冇乜分別。

話時話,有關問題講咗N咁多年,點解一直冇改善?睇吓官老爺點樣扯皮塞責,敷衍了事,咁就一清二楚。環保署大腳交波,話調查受巴士廢氣排放、交匯處同周邊建築地盤以及道路工程影響;又話運輸署同機電署已經採取措施,包括延長通風系統操作時間、加強交匯處內停車熄匙管理,以及叫巴士公司安排以更加環保型號嘅車輛行走相關路線。呢鋪話法,同佢哋老細講三隧分流,話政府要做嘅嘢已經做晒,立法會批就批唔批罷就,冇乜分別,家陣環保官僚已經「盡晒人事」,市民淪為人肉吸塵機,佢哋都「愛莫能助」。

當然喇,交匯處烏煙瘴氣,只係全港空氣污染問題嘅冰山一角。有環保團體公布今年上半年空氣質素調查,發現路邊二氧化氮濃度長期維持喺世衞水平兩倍以上,臭氧濃度創出二十年新高,世衞更加估計,香港每年平均有三千人死於空氣污染,話香港人返工、返學形同搵命博,真係一啲都冇誇張,亦唔怪得外國公司派員嚟香港,個個當堂耍手擰頭。

所以話港產官僚大事做唔到,小事做唔好,移山填海一類複雜大Project固然束手無策,改善空氣質素,歷任政府亦係姿勢大於實際,由曾蔭權爵士嘅「藍天行動」,到上屆政府口口聲聲保護環境係「政府嘅核心工作」,再到家陣林鄭話要將香港建設成「宜居城市」,有邊次係講得出、做得到㗎!最離譜嘅係,港府為粉飾太平,篤數造假在所不惜,試過畀大學教授踢爆,話本港部分空氣監測站設喺大廈天台,根本反映唔到真實情況,有取巧之嫌。咁都唔止,當內地都積極考慮緊全面使用電動車,英國、法國等歐洲國家亦早已為停用燃油車訂立時間表,港府竟然反其道而行,一度取消電動車稅務優惠,簡直吹脹。

一句到尾,港產官僚冇心冇肺冇靈魂,一味玩拖字訣,空氣質素「愈治愈污」,藍天白雲愈叫愈走,每年造成嘅額外醫療開支不知凡幾,真係要市民條氣順番啲,班廢官罰俸扣薪就最啱嘞!