功夫茶:貴賓失救無人理 國泰虐客無極限

2018年11月10日 00:04
東網電視
更多新聞短片

內地作家韓寒講過,世界上邏輯分兩種,一種係邏輯,另一種係中國邏輯。其實呢個世界上「貴賓」亦都分兩種,一種係貴賓,另一種係國泰貴賓,不幸成為後者,分分鐘搞出人命都唔知咩事!

唔係靠嚇㗎!本港著名歷史學者陳明銶上月底從三藩市搭國泰機到香港參加學術論壇,點知不幸因心臟病發逝世,被發現倒臥喺三藩市機場國泰貴賓室廁所暈倒,奇就奇在中間經歷登機、貴賓室關門重啟,始終冇人發現出事,結果足足過咗十八個鐘頭,喺香港接機嘅學生發覺唔對路,連番向國泰追問,至發現陳教授根本冇上機而揭發事件。

喂,因航仲有冇再不負責任啲呀!航班起飛前例牌有最後召集,明知有貴賓未入閘,如果肯行多一步,去貴賓室跟多兩眼,話唔定可以避免悲劇發生,唔怪得家屬質疑因航間接導致乘客失救。有法律界人士就講得啱嘞,呢單畸士值得以疏忽角度展開訴訟,加強保障其他旅客安全都好吖嘛。

大家睇到啦,因航對所謂「貴賓」尚且闊佬懶理,對待「一般」客人仲使客氣嘅!第樣唔講,淨係講機位超賣,國泰喺航空業界已經出晒名,認第二冇人敢認第一。試過有員工抵唔住頸,踢爆公司部分航班超賣近兩成機位,四十幾位畀足錢嘅乘客慘淪人球,對於乘客行程被打亂,因航冇你咁好氣,求其賠幾百銀派幾張爛鬼餐券就打發人坐其他航班,你吹得佢脹吖。

咁都未算最離譜。試過有乘客幫襯國泰假期前往馬爾代夫嘅旅遊套票,點知回程時因當地機場封閉,搞到上唔切返港航班,其他航空公司都有派機長或職員在場協助,又或者稍為延遲起飛時間,唯獨因航愛理不理,結果旅客要自掏腰包萬幾銀買機票返港,點止店大欺客咁簡單,直頭虐客無極限。

冇計喇,國泰近年業績屢屢見紅,淨係前幾年燃油對沖都講緊輸成億億聲,投資失利嘅高層繼續印印腳,反而由基層員工受靶,人手削得就削,服務質素跌跌不休,打針都冇咁快見效。呢嗱,國泰舊年年中大裁員,其中IT部門係重災區,卒之搞到九百多萬名乘客個人私隱大失守,有英國律師行聲稱會進行集體訴訟。枉國泰仲自詡「香港人嘅航空公司」,家陣醜出國際,真係咩架都畀佢丟清光!

正如毛伯伯話齋︰死了張屠戶,不吃帶毛豬。家陣航空業界競爭激烈,服務精益求精,顧客大把選擇,國泰燒鵝價錢做出蔗渣味道,不思進取,自甘墮落,被人唾棄都係咎由自取。