功夫茶:漢奸黎賣產圖救亡 跑了廟跑不了和尚

2018年11月11日 00:04
東網電視
更多新聞短片

壹傳媒前日喺交易中途突然停牌,原因係出售集團喺台灣嘅物業。漢奸黎賣產撲水,表面係緊急救亡,吊住淫媒條命,實際上可能想儲定彈藥,擸錢走人,但正所謂「跑了廟跑不了和尚」,佢老哥策劃佔中,黑金禍港,恐嚇記者,罪孽深重,直頭人神共憤,就算化咗灰,去到天涯海角都有人「認住呢隻英」,隨時準備豬雜侍候。

唔知係咪冇面見人,漢奸黎賣家產都賣得零舍閃縮,零舍鬼祟,淫媒靜雞雞公布所謂「潛在非常重大出售事項」,之後再透過集團高層「證實」消息。正如有證券界人士話齋,出售資產事宜屬股價敏感消息,應該經港交所網站向外統一發布,否則對小投資者好唔公平,有上市公司就試過因選擇性披露股價敏感資料而被譴責。話時話,淫媒之前出售《壹週刊》港、台業務,訊息發布過程同樣混亂不堪,備受詬病,結果卻不了了之,唔通漢奸黎除咗司法,喺金融監管當局都有保護傘照住?

講番今次單刁。據聞淫媒位於台北市內湖區嘅總部大樓物業以四億五千幾萬港元出售,問題係淫媒數簿年年見紅,淨係上個財政年度就勁蝕近五億元,近八年來累積虧損更加接近二十億元,區區四億零只係杯水車薪,連止咳都唔夠。更何況上述物業已抵押畀多家銀行換取融資,漢奸黎套現所得部分要用嚟還債,實際落袋嘅更加有限。

明眼人都睇到,淫媒儼如財政黑洞,漢奸黎救得今次救唔到下幾次,就算賤賣埋用嚟着草嘅海外物業,都未必填得掂呢個氹。漢奸黎自己知自己事,一早諗住後路,金蟬脫殼鬆人大吉,甚至不惜自認契弟,插標出售「親生仔」《壹週刊》,只係最後傾唔埋欄,欲做契弟而不可得咁解啫。鬼咩,漢奸黎及壹淫媒唯恐香港不亂,做埋晒咁多陰騭嘢,一早已被市場唾棄,旗下刊物摺嘅摺,縮嘅縮,連漢奸黎拍晒心口自誇有得搞嘅數碼業務都蝕到趴街,票房毒藥邊個掂親死邊個,邊有人咁懵落疊吖!

有咁耐風流有咁耐折墮,以前漢奸黎有美國佬無限量供應狗餅,家陣狂人特朗普上場奉行「美國優先」政策,再冇呢支歌仔唱。唔摺埋淫媒咩,多多錢都唔夠燒;關門大吉咩,漢奸黎連僅餘嘅影響力都冇埋,到時仲有咩本錢向洋主子邀功討賞?

始終都係呢句︰萬般帶不走,唯有業隨身。古時候十惡不赦嘅罪犯要處凌遲極刑,受盡千刀萬剮嘅零碎苦,正如今時今日淫媒死唔斷氣,今日冇咁隻耳,聽日冇咁個鼻,漢奸黎想話「引刀成一快」?呢個世界邊有咁便宜嘅事!