功夫茶：控煙酒辦做漏招　青少健康冇保障

大學問家胡適曾經講過︰「少年恨污俗，反與污俗偶。自視六尺軀，不值一杯酒。倘非朋友力，吾醉死已久。」弊就弊在喺今時今日嘅香港，官府防止後生仔女酗酒做啲唔做啲，旨意佢哋不如旨意「朋友力」好過。所以話「官僚靠得住，豬乸會上樹」就係咁解。

唔講唔知，香港自從二○○○年實施酒牌制度以來，一直存在好大嘅漏洞，就係只禁止持酒牌嘅食店或酒吧喺「處所內」向青少年售賣酒精飲品，便利店以至超市等「處所外」地方可以「攞正牌」賣酒畀青少年。當局直到舊年至補鑊，將規管範圍擴大到所有商業活動，但原來成年人買酒畀仔女，又或者向相熟嘅未成年人士提供酒精飲品唔算「商業活動」，法例根本無法涵蓋。

有立法會議員就講得啱嘞，何謂「相熟」難以定義，好容易變成不法之徒走法律罅嘅藉口，例如一班人喺工廈開P，個個話大家係「相熟朋友」，只要冇現金交易當場斷正，就吹佢哋唔脹。換句話講，青少年買醉易過借火，新酒例形同虛設。

對於上述質疑，當局話會喺網上尋找可疑派對場所，唔排除進行放蛇喎。聽住先喇，控煙辦擴充成依家嘅控煙酒辦，人手只係由八十幾人增加到一百一十幾人，以前控煙辦已經成日呻人手不足，好多時接到市民舉報後出動已經賊過興兵，家陣管多瓣控酒，加多區區三十丁友，蚊都瞓蛇都死。最大鑊嘅係，執法人員面對兇神惡煞之輩，往往嚇到瀨尿，唔使講第樣，淨係講遍地開花嘅樓上吧，當中唔少有假難民兵團駐場，試諗吓一個深水埗通州街天橋底南亞村，六大政府衙門尚且拖拖拉拉唔敢取締，控煙酒辦想話學人去樓上吧放蛇？除非食咗豹子膽喇！

講真，當局真係有心杜絕青少年接觸酒精飲品，就應該好似毒品咁，邊個提供入邊個罪，官老爺硬係要「網開一面」，咪畀人睇死，唔通又係錢作怪。有辦你睇，港府宣傳「吸煙危害健康」宣傳咗N咁多年，但就係都唔肯嚴令禁止，反而一味加煙稅，庫房係就係袋袋平安，年輕煙民卻不減反增；到咗冇得抽稅嘅電子煙，港府又忽然關心青少年健康，大力出手打擊，簡直精神分裂。早幾年有調查顯示，兩成中學生過去一個月曾經飲酒，相關比例家陣已經增至三成，面對咁龐大嘅「市場」，官老爺邊捨得打擊啊。

有專家形容酒精係一級致癌物，長期酗酒嚴重影響判斷力及記憶力，同將器官浸喺酒精冇乜分別。港產官僚做嘢冇心冇肺冇靈魂，話唔係飲大兩杯返工都冇人信！