功夫茶:高峰未到已逼爆 港人睇病甚艱難

2018年12月09日 00:03
東網電視
更多新聞短片

美國大文豪馬克吐溫曾經講過︰「世界上有三種謊言︰謊言、該死的謊言、統計數字。」睇吓今時今日特衰政府公布嘅數字,市民信佢一成,雙目失明,就知呢句金句珍珠都冇咁真。

功夫茶尋日鬧爆公立醫院急症室人滿為患,醫管局最新數據顯示,自從舊年急症室收費由一百蚊加到一百八十蚊之後,急症室首次求診人數比往年同期下跌百分之四點四,而平均輪候時間就由之前嘅廿五分鐘增加到廿六分鐘。先唔講加價幅度同求診人數跌幅完全唔成比例,齋講廿六分鐘呢個數字,已經完全脫離現實,擺明係官老爺粉飾太平。

呢嗱,本報記者尋日下晝落伊利沙伯急症室睇過,淨係已分流嘅病人已經有幾十人,仲要未計行動不便瞓病床嗰班,睇吓大堂電視屏幕,非緊急病人要等超過七粒鐘。好似有位背痛嘅先生咁,下晝一點去到,護士話仲係處理緊朝早七點幾嘅病人,問你怕未!另一單畸士仲過分,有位女士喺屋企跌倒整傷左眼,爆晒缸都被列為「非緊急」個案,一樣要排六、七個鐘。

病人等到頸都長事小,分分鐘小病拖到大病,大病拖到冇命先至大鑊。有腦中風病人尋日被送入威爾斯親王醫院急症室求醫,點知獲分流為緊急個案,都要等成個鐘至見到醫生,期間更加懷疑被誤診,最終返魂乏術,家屬怒斥「病人喺急症室等到死先有人理」,道出唔少人嘅心聲。

所以話急症室輪候時間篤數就係咁解。之前就有護士組織喺報章登廣告,鬧爆醫管局喺流感高峰期間,將臨時增加嘅病床當恒常數字,減低整體病床使用率,做靚盤數。可惜吖,事實勝於雄辯,各區公立醫院病床長年累月超負荷,唔少病人甚至被迫瞓走廊同埋瞓洗手盆底,唔知嘅仲以為去咗敍利亞又或者阿富汗嘅戰地醫院!話時話,上屆政府係威係勢提出醫院發展十年大計,話會揼二千億元增加病床同手術室,吹到天花龍鳳,點解到依家仲係只聞樓梯響?

不過嘥氣喇,醫管局經費年年加,本身水頭充足,公院十個煲七個蓋卻十年如一日,急症室逼爆只係冰山一角,最得人驚嘅仲係醫療事故鑊鑊新鮮鑊鑊甘,輸錯血、打錯針、派錯藥、開錯腦……沒有最離譜,只有更離譜,證明管理混亂至係最大問題。當然喇,話又要講番轉頭,部分前線醫護一方面呻人手荒呻到樹葉落,另一方面大搞專業霸權,死都唔肯引入「外援」,咁搞法,想唔出事幾難。

始終都係古人講得啱︰「天下之事,以為無足慮,則必有大可慮。」流感高峰期就快殺到埋身,官老爺繼續闊佬懶理,遲早盞爆大鑊嘅咋!