功夫茶：天橋底淪熟食場　食環署闊佬懶理

提起天橋底，大家即時會諗起深水埗通州街嘅「南亞村」，嗰度被假難民兵團長期佔據，淪為吸毒、販毒特區，早就臭名遠播。不過大家可能唔知，位於銅鑼灣維園附近嘅天橋底，其實同樣危機四伏，仲分分鐘變身都市炸彈添！

唔係誇張㗎。有外傭近排趁住天氣轉涼，殺入怡和街天橋底搵食，向同鄉售賣印尼特色小食，記者現場目測，近十個檔口客似雲來，以每轉二十人、每碗四十蚊計，一日隨時賺幾千銀，問題係全程明火煮食，油煙燙傷途人事小，一個唔覺意搶火事大，你知喇，嗰度人多車多又近民居，容乜易一鑊熟㗎！

仲有吖，熟食檔將食材隨地亂放，檔主徒手製作飯盒後，冇遮冇掩就咁喺馬路邊賣畀客人，衞生情況極度惡劣，好容易病從口入。家陣香港數疫拍門，一時話登革熱，一時又話鼠傳人戊肝，加上流感高峰期殺到埋身，爆起大鑊上嚟，絕對唔係講玩。

有人可能會問，班外傭又無牌擺賣，又影響衞生，食環署因乜解究翹埋雙手等運到？唔講猶自可，一講把幾火，明明食環署職員就喺街尾巡查，居然掂行掂過視若無睹，阻嚇力仲低過舖頭出面嗰啲人形紙牌。

話時話，外傭經營無牌熟食檔，喺區內已經係老大難問題，除咗重災區嘅維園附近天橋底，銅鑼灣消防局附近涼亭亦有類似情況，試過有關注團體向區議會反映，官老爺拍晒心口話會採取聯合行動，結果食環署過去三年淨係提出約廿宗檢控咁大把，同變相「發牌」鼓勵外傭開檔冇咩分別。

真係諗極都唔明，食環署職員對住班老弱傷殘勢兇夾狼，阿婆賣一蚊紙皮又拉又鎖有之，逼到無牌小販跳海浸死有之，你話叫佢哋拉隊清拆南亞村木板屋，就話驚畀班神高神大嘅南亞幫打番轉頭啫，家陣講緊外傭咋喎，點解一味扮鵪鶉？咪畀人批中，唔少外傭同南亞幫同聲同氣friend過打band，食環惡吏唔驚就假。好似九龍公園咁，每逢假日例必有外傭開行喇叭載歌載舞，造成滋擾，皆因吸引大批南亞狂蜂浪蝶前來?女，結果咪冇人夠膽干涉囉。

唔怕唔識貨，最怕貨比貨。同樣係對外傭執法，入境處今年以來拘捕嘅非法勞工當中，就有一百六十多名外傭，該處又強調會嚴格把關，外傭申請來港，若發現有不良紀錄或違規行為，會考慮拒絕申請，邊個衙門實心為民，邊個衙門胡混度日，畫公仔唔使畫出腸。食環惡吏最叻欺軟怕硬，蛇王吞泡，被封為「港產城管」，絕對實至名歸！