功夫茶:旅客帶刀照放行 機場保安真失魂

2019年01月13日 00:04
東網電視
更多新聞短片

未入正題之前,功夫茶先同大家講吓歷史。話說荊軻刺殺秦始皇失敗後,佢老友高漸離繼承其遺志,打算利用任職宮廷樂師之便,喺樂器裏面暗藏鉛塊當殺人武器,雖然同樣失敗收場,但就激發咗秦始皇嘅靈感,發明一道由磁石造嘅門,當刺客帶兵器靠近時會被門吸過去,就係憑住呢個古代版金屬探測器,秦始皇終其一生都冇再遇刺。

古仔講完,返番嚟二千幾年後嘅香港國際機場,咪睇今時今日科技先進得多,探測武器早由機器代勞,甩漏反而仲多過舊時,你話係咪吹脹。話說本報接獲消息,一名旅客早前喺香港機場乘搭飛機經日本轉機,手提行李內六把刀鋒長達十二厘米嘅鋸齒利刀,居然可以掂行掂過進入禁區,仲順利通過埋X光檢查,懷疑當時機場保安人員「睇漏眼」,冇發現行李內藏有違禁品。

咁都未算吖,上述旅客之後長驅直入,喺無人攔阻嘅情況下將藏有利刀嘅行李帶上飛機並順利抵埗。由於一般手提行李安檢工作主要由出發地負責,如果唔係該名旅客需要轉機,當地保安人員進行二次安檢,後果不堪設想。由於事態嚴重,日本方面透過航空公司向香港機場保安發出投訴電郵,今次真係乜架都丟清光。

當然喇,丟架事小,旅客安全事大。正如立法會議員話齋,咁大個保安漏洞篤眼篤鼻,有乜理由日本睇到,香港機場保安睇唔到?今次就話帶六把刀啫,下次換轉恐怖分子帶計時炸彈上機,仲得了嘅。

話時話,香港機場近年排名跌跌不休,其中保安鬆懈猶如無掩雞籠,更係長期為人詬病。本報之前就曾踢爆機場離境大堂中門大開,背囊客大模廝樣通過金屬探測器直闖禁區,保安人員照樣視而不見,見而不理。之前又有人擅自走入捷運系統管道,搞到系統癱瘓幾粒鐘。查實機場保安當局自己都知衰,試過放蛇扮旅客,將刀具放入手提行李過X光機,檢查員果然因為掛住玩手機而懶理,簡直係沒有最離譜,只有更離譜。

唔講猶自可,一講把幾火。原來自「九一一」恐襲之後,機管局為加強機場保安,向離境旅客徵收「旅客保安費」,點不知錢就識收,機場安全卻每況愈下,國泰等航空公司更乘機掠多旅客一筆,咁多年刮埋刮埋數以億元計,問你點頂!

所以幾時都話弗備難,難必至。嚟緊己亥豬年屬「天雷無妄」卦象,據講係交通等公共安全事故嘅高危期,話口未完,港鐵旺角站尋日真係爆單縱火案,機場保安繼續魂遊太虛,因住爆大鑊吖!