功夫茶:香江老鼠打橫行 只因官僚皆病貓

2019年02月13日 00:04
東網電視
更多新聞短片

香港地衣食住行樣樣難,對人類嚟講就梗係「居不易」喇,之但係喺老鼠眼中咯喎,香港絕對係宜居城市,多得港產廢官呵護有加,老鼠家族繁衍壯大,直頭要送番頂「萬鼠傘」畀呢班再生父母!

立法會尋日討論鼠患問題,政府文件顯示,舊年房屋署一共捕捉到八百一十隻老鼠,平均每條屋邨得廿七隻咁大把,有議員就狠批政府部門各自為政,毫無協調。話時話,公屋鼠輩橫行早就唔係今時今日嘅事,葵芳邨有街坊三個月內捉到一百八十隻,比例幾乎拍得住成個房署。官老爺次次收到投訴,次次話會做嘢,實際係滅鼠人員行行企企食番幾味,輕輕鬆鬆咁又一Day,市民真係多得佢哋唔少。

當然喇,天下官僚一樣廢,房署捉老鼠唔專業,食環署防治蟲鼠組亦唔好得幾多。大家有眼見,成個香港淪為老鼠樂園,橫街窄巷、市中心、郵輪碼頭、法庭統統淪陷,甚至試過有外國遊客日光日白被鼠咬,搞到香港醜出國際。可能大家仲記得,早幾年廣州滅鼠大王來港獻技,短短一粒鐘就喺旺角捉到十七隻老鼠,公務員加埋外判承辦商,滅鼠大軍大大話話成千人,拍埋去輸足九條街。仲好意思叫「防治蟲鼠組」?改名「保育蟲鼠組」喇,笨!

港產廢官滅鼠無能都算嘞,仲要閉關自守,唔識與時俱進。好似美國紐約等大城市採用乾冰滅鼠法,將乾冰置於鼠穴,利用融化後釋出嘅二氧化碳滅鼠,成本低且對環境無害,一舉兩得。反觀食環署,咁多年嚟堅持土法滅鼠,獨沽一味鼠餌鼠夾,仲要好似慌死老鼠「誤墮陷阱」,老鼠米用嚟用去都係紅藍兩隻色。有防治蟲鼠主任講過,香港老鼠比外國野鼠聰明,係真唔係冇人知,但話比港產官僚聰明,就肯定珍珠都冇咁真!

可能畀人鬧得多,食衞局話會研究利用高科技滅鼠,包括以夜視或熱能探測鏡頭攝取錄像,監察老鼠活動;又話考慮引入小型機動掃街車及改善版太陽能廢物壓縮箱,改善環境衞生。講係咁講,但實際效果係點,前線執行會唔會偷工減料,仲要睇過至知。港府之前夠話引入石油氣誘捕蚊機啦,結果咪又係畀人踢爆喺部機嘅外殼貼防蟲貼裝假狗。野豬問題亦係一樣,廢官既唔夠膽撲殺,又做唔好絕育,卒之搞到怨聲載道,當局又係拖到依家至話引入新科技進行「監察」,仲有冇再遲啲吖。

諗諗吓身為香港人都幾悲哀,捱騾仔捱到隻積咁至僅堪餬口,邊及得老鼠蚊蟲咁優游自在?咪話功夫茶唔警告,豬年「野豬為患」猶自可,最怕出年鼠年老鼠「當家作主」,傳播惡疫,咁就真係弊一弊都冇咁弊嘞!