功夫茶:壹淫媒賣產吊命 漢奸黎最後瘋狂
查撐篤撐查篤撐,有請賣仔唔成、折墮到要賣產救亡嘅漢奸黎出場!冇錯,契弟周身唔掂,四圍撲水,壹淫媒日前發出短暫停牌公告,話涉及可能出售台灣一項土地物業喎,已經係短短三個月內第二度公布出售重要資產吊命嘞。咁即係點?即係嗰頭近囉。

嗱嗱嗱,一如既往,壹淫媒又係吞吞吐吐、遮遮掩掩,到家陣都未有進一步交代出售物業詳情。睇番舊年十一月壹淫媒出售台灣物業嘅做法,又係擠牙膏式由高層放風,令小股東無所適從,簡直靠害。問題係,壹淫媒長期靠「賣、當、借」度日,資產賣完又賣,日後勢必陷入「賣無可賣」嘅困局,真係除埋條底褲去當都唔得掂呀。

唔講唔知,漢奸黎舊年出售台灣物業,話就話作價四億五千幾萬港元,之但係壹淫媒欠下一身街數,七除八扣,實際得八千零萬落袋。以其半年虧損高達二億元、八年累蝕廿幾億元計算,套現雞碎咁多,燒兩燒渣都冇得剩,唔怪得話都冇咁快又要賣產嚟苟延殘喘嘞。正如證券界人士話齋,壹淫媒賣產後,台灣業務需租用辦公室營運,成本更難控制,下一步必然縮減人手,睇怕香港「假自僱、真裁員」呢條屎橋,台灣都用得着喎。

咁講喇,契弟多行不義必自斃,爛果報愈出愈薄,廣告都唔多個,就知咩叫有咁耐風流、有咁耐折墮。唔好話功夫茶見死不救,家陣就醒契弟一條好橋,遲早資產賣無可賣,不妨效法以前嘅窮人,賣女賣老婆落火坑填氹,橫掂契弟連親口承諾決不出售嘅親生仔《壹週刊》最終都插標求售,仲有咩係唔可以賣吖。再唔係,賣血賣腎一樣得啫,怕只怕漢奸黎嘅洋奴DNA深入骨髓,啲血有毒,個腎又虧,監平監賤都未必有老闆肯落疊咋。

即係咁,上帝要你滅亡,必先要你瘋狂,家陣漢奸黎上演最後瘋狂,大家即管放長雙眼睇吓佢死撐得幾耐。可能契弟𢱑爆頭都諗唔明,何解自己咁出力討好洋主子,肝腦塗地在所不惜,結果連半塊狗餅都分唔到,仲要搞到好似死曱甴反肚咁款。冇計喇,特朗普奉行「美國優先」,對住盟友一樣反轉豬肚,仲鬼得閒理你條契弟咩。

當然喇,漢奸黎之所以捱到今日仲未斷最後一口氣,都要多得北大人心慈手軟,喺關鍵時候落吓廣告、科吓水畀佢吊命。有紅色奶水養住咯喎,壹淫媒死極都死唔去就係咁解。呢,北大人會唔會又忍唔住統戰條漢奸,再擠啲紅色奶水出嚟,大家即管𥄫實,篤撐!