功夫茶:減碳目標空口講 環保官僚盡卸膊

2019年06月15日 00:04
東網電視
更多新聞短片

美國前總統甘迺迪名句︰不要問國家為你做甚麼,問問自己可以為國家做甚麼。今時今日港產官僚搞環保深得箇中三昧,起勢問市民可以為地球做甚麼,而唔係政府可以為地球做甚麼,真係蒲也麼!

話說可持續發展委員會尋日起展開為期三個幾月嘅公眾諮詢,收集市民對二○五○年減碳目標嘅意見。根據《巴黎協定》,直到二○五○年,全球平均升溫必須控制喺攝氏兩度以內,港人平均年碳排放則要減至少於兩公噸。至於點樣可以達標?諮詢文件舉例,到時市民每個月只可以用一百五十蚊電費嘅電量、五十蚊嘅水以及煤氣、每日只能夠用一個超市膠袋,亦唔可以外遊。

環保減排係全球大勢所趨,好似英國咁吖,最近就公布減排新目標,二○五○年前將碳排放量減至零。問題係,保護環境官民有責,一味要市民犧牲生活質素,官老爺自己就翹埋雙手「坐以袋幣」,始終講唔過去。人哋英國嘅新減碳目標,並唔係空口講白話,仲包括為電動車全面取代傳統車訂立時間表等配套措施。有團體就講得啱嘞,政府減排不力,卻將決策權個波射畀市民,仲有冇再不負責任啲吖。

當然喇,官老爺醉翁之意不在酒,諮詢文件一方面建議將來使用最少八成「零碳電力」,另一方面又話本地可再生能源潛力非常有限,有必要考慮採用「區域合作」嘅方法,再講白啲,即係增加向內地購買核電咁解。

睇到呢度,看官們係咪覺得熟口熟面呢?冇錯喇,特衰政府次次諮詢次次玩假,一早有晒既定立場,之前土地供應公眾諮詢,專責小組方案都未出爐,特衰政府已經搶閘公布「明日大嶼」填海計劃,今次你慌唔係又想重施故技,為增加購買核電鋪路咩。不可不知,核電雖則係清潔能源,但爆起大鑊上嚟,後果不堪設想,因此各地政府處理相關議題無不臨深履薄,更何況以香港今時今日咁嘅環境,增加向內地買電,等於免費提供彈藥畀有心人炒作,盞添煩添亂嘅咋,官老爺以為藉「諮詢市民」過橋就可以蒙混過骨,未免太傻太天真。

不過市民都見怪不怪咯,港府搞環保就係咁,唔係敷衍卸膊,就係講多過做,香港想有藍天白雲綠水青山都幾難。淨係睇吓官老爺點樣喺空氣指標上下其手,就知咩料,呢頭建議將二氧化硫及PM2.5嘅標準收緊,嗰頭建議放寬超標次數,擺到明想做靚盤數粉飾太平喇。

真係諗起都一殼眼淚。香港地唔單止政治立立亂,連天空都灰濛過人,空氣都渾濁過人,「居大不易」咯喎,市民想唔用腳投票棄城都唔得喇!