功夫茶:癮君子冇錢開飯 隨時淪政治死士

2019年07月15日 00:04
東網電視
更多新聞短片

滿清時代國人沉淪毒海,以致舉國幾無可籌之餉、無可用之兵,而香港被英國佬割佔後淪為向內地傾銷鴉片嘅橋頭堡,更加揭開近代中國喪權辱國嘅苦難歷史。所以幾時都話,掃毒唔搞一盤棋,「中國夢」無從談起。

阿爺掃毒有幾咁堅決,唔使功夫茶多講,淨係睇吓國家級領導人親自部署聯省行動,香港前一哥被提名聯合國反毒要職,就知咩料。再睇吓統計數字,舊年內地執法部門喺金三角邊境地區繳獲近三十噸毒品,其中冰毒同K仔更分別增加四點二倍同三十五倍。即使係首善之地嘅北京,當局亦破獲近千宗毒案,都咪話唔得人驚。至於香港咯喎,老細捽起上嚟,就算交功課都要做吓樣,呢排執法部門屢破毒品大畸士,市值郁吓幾千萬甚至上億,就係咁解。

即係咁,打擊毒禍市民就梗係笑呵呵,之但係道友冇啖好食,分分鐘會引發其他社會隱患,絕對唔講得笑。歌神話齋,「為兩餐乜都肯制,前世。」正常人冇錢開飯,揸支槍打劫銀行都夠膽死;家陣嚴打之下毒品供應同豬肉一樣量少價高,癮君子冇錢開飯,試問有咩做唔出吖!

嗱,唔係靠嚇㗎!香港七國咁亂,幾乎日日開大片咁滯,講句難聽啲,反對派同班搞事分子起勢挑釁警方,無非都係博擦槍走火出現「第一滴血」,進一步打擊港府管治,遂其奪權陰謀。問題係「政治死士」去邊度搵?旨意嗰班黑衣𡃁仔喎,一個二個蒙面戴口罩,至叻就係hit and run做縮頭烏龜,就算有人夠薑,「安家費」斷估亦唔會平,分分鐘要冚家攞美國綠卡至掂。

道友們就唔同講法嘞,雖然班友追龍追到手軟腳軟,但勝在膽正命平,正式「唔死都冇用」,除咗扮演「警暴」「犧牲品」,「死控」港府「暴政」亦開正佢哋嗰瓣,呢啲咪戲路縱橫囉!

搞成今日咁嘅田地,都係港府縱容惹的禍。你估以前香港地毒品問題唔嚴重咩?只不過多年來犯罪分子「朝裏有鬼好辦事」,地氈下嘅蛇蟲鼠蟻一直冇人理咋。最典型例子莫過於黑幫和勝和前坐館、泰國大毒梟「上海仔」郭永鴻,條友喺警方同司法兩把保護傘力撐之下,春江水寒鴨先知,喺落鑊之前腳底抹油着草海外,至今毛都冇少一條。

始終都係呢句,掃毒只有一國,除惡沒有兩制。中央最近接連出手剷除各省市庇毒保護傘,甚至連掃黑辦主任、公安禁毒大隊長等一樣冇走雞,名副其實「全覆蓋、無死角」,港府繼續唔嗲唔吊「寬鬆軟」,唔係諗住要阿爺親自出手清場下話?