功夫茶:屋署驗窗得啖笑 難怪香港淪危城

2019年08月15日 00:04
東網電視
更多新聞短片

禍從天降,災向地生。飛來橫禍呢家嘢,有時真係避無可避,好似海嘯地震咁,邊有得避啊!之不過,我哋所居住嘅都市陷阱處處,明顯就人禍喇,好似冧樹壓死人,又好似招牌銹蝕嚴重而搖搖欲墜,真係睇見都牙煙,一個唔覺意,分分鐘「中頭獎」,攞命㗎!

嗱!唔好以為功夫茶鍾意發牢騷啊,睇見啲官僚坐而論道,一味靠吹,想唔火都嚟就難咯!呢,屋宇署自二○一二年實施「強制驗窗計劃」至今,成效不彰,申訴專員公署都忍唔住狂數佢六宗罪。功夫茶都冇佢咁好氣,搵啲屋宇署離晒罩嘅糗事同大家分享吓,睇吓班官僚點樣「強制」法!

嗱,屋宇署甫推出「強制驗窗計劃」,好似係威係勢咁款,當時講明每年選定五千八百幢目標樓宇進行強制驗窗,首個檢驗周期預計於一七年中完成喎。之但係截至一八年,只有百分之三十七被列為目標樓宇。如果按照屋宇署一七及一八年每年選定四百幢目標樓宇作計算,即係話該署需要用近四十二年先可以完成首個檢驗周期。阿哥,人生有幾多個四十二年呀?真係「窗若有情窗亦老」!驗完窗,老婆都變阿婆咯!

喂,好心屋宇署啲官僚咪玩語言偽術喇,家陣強乜嘢制啫?你哋做嘢一味死拖爛拖至真,死得人㗎!等功夫茶舉個實例啊,今年初尖沙咀美麗華酒店有一扇鋁窗從高處墮下,擊斃一名剛來港嘅內地女遊客,事後酒店一名女工被捕,相信都係日久失修致之!嗱,你都咪話唔邪,之後大埔富善邨、屯門青山灣、土瓜灣同埋天水圍竟然接連發生墮窗事件,好彩無搞出人命咋!

呢,屋宇署所謂強制驗窗,講到尾就係歎慢板,阿哥,呢啲咪累人累物囉,唔該咪咁hea啦!睇見佢哋做嘢,真係一隻筷子食蓮藕——拮眼啊!話時話,講開屋宇署嘅懶散嘢真係令人扯火,有乜理由有一百四十二宗早於一二年發出但未獲遵從嘅驗窗通知,屋宇署要過咗五年先至向有關業主發出警告信㗎!唉,咁搞法,屋主個孫都大學畢業喇,全家都搬走晒喇!

眼見屋宇署啲官僚個個好似吞咗幾擔豬油咁,申訴專員都忍唔住叫屋宇署加把勁,積極監察,盡快處理積壓嘅驗窗通知;同時,要進入單位進行實際審核,而唔係以抽查率作為工作指標,對未遵從驗窗通知嘅業主必須採取執管行動。

咁又係呀,事關人命,功夫茶提醒屋宇署一眾官僚千祈咪以為意見接受,態度照舊,人工照𢭃!話就話禍從天降,畢竟飛窗殺人根本就係人禍,唔該官僚醒醒定定啊!