功夫茶:司底驊避政龜縮 不如歸去養鮫魚

20190816
東網電視
更多新聞短片
一個亂世或者衰世,通常都會有啲前兆,好似貓唔捉鼠,又或者德不配位、力小而位尊嘅高官,只知霸住毛坑唔拉矢,遇事一味虛應,九唔搭八,淨係識帶你遊花園,廢噏當秘笈。呢,見到佢出現,功夫茶就好想問候佢:你究竟做乜諗嘢?一味只見你身郁,唔見米白嘅?
哈!相信凡我讀者,都知道功夫茶講緊邊個廢柴高官喇!冇錯,就係嗰位上任以來醜聞纏身、民望屢創新低,有「墊司底」之稱嘅「避政司司長」鄭若驊啦!講開佢嘅臭史,一匹布咁長,遠嘅唔講喇,就好似近期示威衝突中嘅被捕個案有不同檢控標準,連律政司內部都有一班律師以匿名信挑戰佢嘅檢控決定,就知佢幾咁不得人心。
唉!鬼咩,鄭若驊帶領嘅律政司連番甩轆,淨係拒絕修改過時嘅「不誠實取用電腦」罪咋,最終導致十幾宗案件須改控其他控罪,甚至撤控添,令香港出現執法真空。一節見則百節知,佢做嘢有幾求其,可想而知!呢,日前佢練完龜縮功,白眼一翻,又化身鍵盤戰士,發表網誌話早前同一批曾到內地實習嘅法律學生會面,鼓勵學生體驗不同法律制度嘅同時,多介紹香港嘅法律制度同優勢喎!偉大得佢啊!
哼,唔講好哋哋,一講功夫茶火都扯到上頭髮尖,直情要燒佢數簿!請佢食超記老味!喂,你大姐甫上任啫,席不暇暖就放生被官媒形容為「活脫脫一副賣國求榮漢奸嘴臉」嘅黎智英單政治黑金案,咁仲唔止啊,漢奸黎涉及嘅其他案件,一樣遲遲唔檢控,包括佔中案、刑恐東方報業集團男記者案,司底驊擺明當乜事都冇發生過,尋且做咗漢奸黎嘅司法保護傘,仲講乜香港法律制度同優勢呀?知唔知個「醜」字點寫㗎?
「避政司司長」仲繼續獻世,佢話同法律學生會面係律政司配合政府施政新風格嘅第一步,將繼續帶來新安排,讓政府更能掌握民情喎。有人就講得啱嘞,司底驊可能早前被中央照肺,先至敷衍發文指多與年輕人溝通,建議佢先做好本分,仲窒佢:「同啲法律尖子對話有用咩?今次衝突源頭係一群睇唔到自己前途嘅年輕人啊!」旨哉斯言!
功夫茶只能喟然嘆曰:同一個只懂龜縮嘅廢柴高官講「施政新風格」,慘過對牛彈琴,「避政司司長」已失信於民,古人話,「得其民有道,得其心,斯得民矣」,阿姐佢做得到至奇!今以「龜縮功」獨霸稱雄嘅佢,已令香港法治崩壞,司法正義不彰,功夫茶懇請佢若有一分知恥之心,不如歸去,一於「冚家剷泥齊種樹,汝家池塘多鮫魚」,不亦笑傲江湖,自得其樂乎!