笑看天下:林鄭何苦要抱薪救火-施友朋 評論員

2019年09月12日 00:04
東網電視
更多新聞短片
政府宣布撤回修訂《逃犯條例》,不過暴力衝擊持續,更加愈演愈烈,政府的民望亦往下尋底。最新民調顯示,政府三名司長評分全線下跌,那位被譏為「避政司司長」的律政司司長鄭若驊評分為十七點七分,創歷屆特首、司長評分的新低,亦係首次跌穿二十分嘅司長。
鄭若驊能不稱官,彰彰明甚。佢其身不正,上任至今醜聞多如天上繁星,最可恨是身為律政司司長,不守護香港法治的核心,維護法律公平正義,反而知法縱法,涉「放生」壹淫媒漢奸黎牽涉的多宗案件,令其逍遙法外,繼續禍港;至於司底驊領導嘅律政司,在檢控工作上多次甩轆,內部更加立立亂,日前就被揭發有律政司檢控官涉嫌教示威者逃避調查,令人質疑律政司能否公正處理案件。如今逾千人被拘捕,律政司司長不是應給予專業意見,睇吓如何加快檢控工作嗎?
不過,旨意佢都係「靜寂的空氣」(silent air),即係「嘥×氣」!不是嗎?漢奸黎涉刑恐本報男記者一案,一拖逾兩年,本報及受害人去信十四封,佢不是索性違反服務承諾,就係廢噏無謂,其中第八封信嘅回覆竟然係「要諮詢法律意見」。喂!大姐,你係律政司司長啊,仲要問邊個嘅法律意見?高薪厚酬唔通請你來托鐵?真係九唔搭八!睇嚟反修例暴亂衝擊被捕嘅千多人,照司底驊嘅檢無法、控無能,檢控到佢自己百年歸老都未檢控得完!依老朽看,又係警察捉人、庭上放人居多,城中富豪其實不必憂心政府不網開一面!咁嘅超低能律政司,網開十面喇!
古人說,天下有三危:少德而多寵,一危也;材下而位高,二危也;身無大功而有厚祿,三危也。今林鄭抱住個「三危」嘅惹火尤物,不是「抱薪救火」嗎?難怪反修例之火愈燒愈烈!老朽雖知林鄭剛愎自用,仍願做好市民再進一言:不炒此「三危惹火尤物」,咁就惟有攬炒一鑊熟!