笑看天下:覓地建屋勿再望梅止渴-施友朋 評論員

2019年09月13日 00:04
東網電視
更多新聞短片
臨近區議會選舉,平時難得一見的政客忽然眾聲喧嘩,政黨一個二個為「民生」議題發聲獻策,尤其政府一直視為重中之重的房屋問題!香港房屋問題一大籮,歷屆政府喺呢個深層次問題上,向來口水多過浪花,光說不練,致使至今依然有數以十萬計基層住喺劏房!而建築商有所謂「納米樓」,四、五百萬元都係買到豆腐膶咁大嘅居住空間,叫人情何以堪?
其實,殖民地時期的十年建屋計劃,最終都能夠喺十五年內建成一百五十萬個單位,喂!呢啲咪叫做「安得廣廈千萬間,大庇天下寒士俱歡顏」囉!為甚麼以前得,回歸後就唔得?而且回歸咗成二十二年,政府喺房屋政策上仍然一味大隻講,廢噏無謂,甚且愈搞愈差,完全沒有全盤為基層小市民着想,搞到房價高企,租金持續向上,民生困苦,不但貧戶怨氣沖天,即使買唔起樓而焗住捱貴租嘅中層,亦活得十分冇滋味!交稅有份,申請公屋又冇資格,「派糖」又最少,夾心階層,有氣冇碇抖也!
呢,自一九八五年起,聯合國每年將十月首個星期一定為「世界人居日」,目的係喚起社會關注基本住屋嘅權利。香港又話係國際金融中心,一個幾好都有嘅國際大都會,全球最富裕嘅地區之一;然而,點解仲有數以十萬計嘅基層住喺劏房、籠屋?環境惡劣,食喺嗰度,屙喺側邊,煮食切菜就在馬桶旁!小朋友做功課就屈膝床上,有啲「棺材床位」更只容許你雙腳一伸入去就要瞓覺,一點活動空間也沒有,試問這是「人間」還是「地獄」?這是香港之恥,也是高薪厚酬的政府高官不作為之恥。
香港不缺土地,惟政府從不肯努力覓地建屋,最近有政黨建議政府採用《收回土地條例》,大刀闊斧收棕地興建公屋;有團體倡全面收回粉嶺高球場興建公營房屋;又有要求收購工廈改建公屋等。「世異則事變」,政府在覓地建屋上切忌再望梅止渴!