功夫茶:護傘洞破風雷急 獵狗末路劫難逃

2019年11月11日 00:03
東網電視
更多新聞短片
池塘一夜秋風冷,獵狗終須山上喪。人稱「上海仔」嘅本港黑幫和勝和前坐館泰國大毒梟郭永鴻,因為犯案纍纍、棄保潛逃而淪為落水狗,加上其販毒集團成為國際社會眼中釘,出貨財路被多國政府合力截斷,搞到家吓要四圍賒借撲水,呢啲咪叫有咁耐風流、有咁耐折墮囉。
嗱,本報收到消息,上海仔近年透過身邊人不斷打長途電話予中港澳人士「籌旗」度日,金額由五十萬元至過百萬元不等。當然啦,呢挺通緝犯、過街老鼠,一定唔會係有借有還嘅上等人,借錢畀佢隨時惹官非,有人敢借至奇。
喂,阿哥,上海仔作惡多端,仲可以捱到今日都算奇迹,每次警方執法前都可聞風先遁,仲兩度棄保潛逃,到底憑乜嘢咁神通廣大呢?有道是「鼠憑社貴,狐假虎威」,除咗佢自稱有國安及公安兩把保護傘,仲多得警匪一家,兼且有律政司照住,當然巴閉。
呢,好似佢「條𡃁」本港退休高級警司王福林,兩條友拍住上過大海搵食,本來都好好景㗎,點知上得山多終遇虎,二人涉嫌於澳門盜竊及訛騙,偷取本港富豪存於夾萬嘅籌碼及現金合共六千萬元,其後被該富豪發現並到澳門舉報二人,遭通緝至今。
當然,上海仔喺本港涉及兩案四罪都冇事,點少得司法包庇!佢更大嘅靠山,乃係有「契媽」關照!所謂走佬要有卡,契媽送上「AE黑卡」畀佢任碌,之所以貪威識食、好嫖爛賭依然風光度日,就係咁解。據悉呢個契媽來頭不小,乃係一名曾任暫委法官嘅法律界人士配偶,契爺咁猛料,難怪律政司呢把保護傘咁出力照顧,為佢製造潛逃機會。上海仔碌完卡要找數,就派手下四出度水償還,當中會唔會涉及佢犯罪所得嘅那渣錢,諗都諗得到。
各位街坊睇到啦,上海仔既有本港警方及律政司充當保護傘,又有法律界契爺契媽照住,兼自稱有「雙安」撐腰,即係有齊「全國法律保護傘」,難怪佢咁神通廣大,餐餐都走得甩啦。
不過咁,眼前道路無經緯,皮裏春秋空黑黃。螃蟹橫行一時,到頭來不免被煮!所以呢,即使上海仔有過風光日子,但佢始終都係死路一條!仲有啊,信用卡嘅持有人同簽卡人不符,還款來源又唔清唔楚,有關行徑已有串謀詐騙及洗黑錢之嫌,兩罪最高分別監禁十四年,到時「兩母子」攬住一齊踎監,都好慘情啫。
正所謂,鳥窮則啄,獸窮則觸,人窮則詐。鳥無處可飛時,就會亂啄;野獸無路可去時,就會到處亂撞;人到走投無路時,就會開始欺騙!上海仔多行不義,昔日保護傘已隨雨打風吹去,契媽亦唔照得佢幾耐,一旦山窮水盡,除咗落水獵狗山上喪,乜仲有第二條路等佢咩?