笑看天下:坐而論道 薪高糧準-施友朋 評論員

2019年12月03日 00:04
東網電視
更多新聞短片
反修例示威暴潮持續近半年,早前區議會選舉時難得的平靜,也不過是曇花一現。剛過去的周日,數以萬計市民又響應網上號召參與尖沙咀遊行,之不過又係演變成堵路及衝突,而且人數眾多,可見不少人根本不想見到香港有平靜的日子!
呢!黑衣暴徒兇性不改,多間商舖被「裝修」、港鐵黃埔站出入口被火燒、掟磚、砸毀交通燈、塗污噴漆……烈火暴行依然,特區政府仍然靠把口止暴制亂,到處見到警民衝突、硝煙圍城,香港已非昔日的「福地」,更不是「宜居城市」,能走的,都計劃遠走他方!
陳寅恪的《殘春》有云:「無端來此送殘春,一角湖樓獨愴神;讀史早知今日事,對花猶憶去年人。」老朽愚昧,讀史不知今日事,總不大相信,香港回歸二十二年,竟然搞成今日如此一個爛攤子!喂!阿哥,大清開國一百七十多年才進入衰世,香港不過回歸二十二年,眼見深圳短短十多年,經濟科研創新一路奔騰躍飛,而香港不斷沉淪衰頹,「一國兩制」變形走樣,美國國旗迎風飄揚,都真係成為「一道美麗嘅風景線」,小漢奸因美國通過制裁中港嘅惡法而雀躍到好似佢祖宗十八代都「與有榮焉」。唉!一個衰世,做漢奸可以無恥到咁賤格,老朽活到這把年紀總算開了眼界!
香港回歸後,歷任特首一個不如一個,而中央政府一再有眼無珠,睇錯一個又一個!香港此刻,終劫數難逃,真係變成一個衰世,止暴制亂無期,而區議會選舉「得米」者,係一邊脫下黑衣一邊換上西裝嘅反對派,未來四年區議會肯定淪為另一個政治鬥獸場,民生經濟放一旁;加上管治班子朽木充棟樑,鼠目寸光,至叻廢噏當秘笈!民間依家水深火熱,建造業、餐飲業、進出口等嗌晒救命,申請破欠基金個案激增。要言之,基層牛衣對泣,廢官坐而論道,依然薪高糧準!