功夫茶:捕鼠增多想邀功 原來以前衰怠政

2019年12月05日 00:03
東網電視
更多新聞短片
香港號稱國際大都會,又係亞洲金融中心,唔使拋浪頭,都嚇得吓人!誰知華麗地氈一揭開,原來老鼠多到嚇暈人!喂,阿哥,過去十一年,政府耗資近十七億元公帑防治鼠患,結果都算出人意料咁威水:去年九月,香港爆出全球首宗人類感染大鼠戊型肝炎個案!咁都未算勁,呢,全球至今錄得九宗個案,香港包辦咗八宗!就今年計,已發現咗六宗個案,當中一人死亡。
嘞,管中窺豹,香港鼠患有幾得人驚,都毋須功夫茶多講喇!開講都有話,花被冚雞籠,外便好睇裏面臭。香港長年飽受鼠患困擾,官僚滅鼠無方,搞到全港十八區幾乎全變成「老鼠樂園」,衞生環境惡劣至極。香港老鼠又大又肥,有啲街坊甚至驚呼:嘩,原來老鼠真係大過貓㗎!廢柴政府按開支計算,殺鼠一隻,成本要三千七百蚊!結果都係令香港成為鼠患重災區,爆發大鼠戊肝醜出國際!
嗱,最新文件透露,食環署今年截至十月共捕獲一萬九千多隻活鼠,較去年同期增加百分之四十四,堵塞嘅鼠洞亦增加咗百分之四十一。當局認為係自五月啟動「全城清潔」行動後滅鼠漸見成效。功夫茶從來都唔信啲高官雞手鴨腳揸支掃把,或攞塊濕毛巾揚兩揚,蛇蟲鼠蟻就會自動消失,做騷你估會變魔法咩?
查實係當局針對食肆違例事項,譬如不當棄置廚餘嘅檢控多咗,換句話講,即係執法勤力咗,少咗棄置廚餘、污水橫流,自然老鼠就少咗!而更重要嘅係捕鼠有法。都算食環署知恥近乎勇,自己滅鼠超低能,惟有請世衞介紹來自英國嘅鼠患專家,於上月初來港提供改善方法,除咗喺原已進行過測試嘅荔灣、鴨脷洲、錦田公眾街市滅鼠外,又額外於駱克道、土瓜灣同埋沙田街市進行新一輪行動,果然一擊即中!
其實講到尾,官僚做嘢向來後知後覺,唔踢就唔郁,一字記之曰:懶!兩字記之曰:怠政!家陣忽然捉多咗老鼠喇,又認屎認屁!有專家就批評當局公布捕獲老鼠數目,好似好英明神武咁款,明顯想邀功!之不過又同時暴露冇靈魂政府,鼠患問題係多年縱容所致,亦即係非不能也,實不為也!
功夫茶不能不嚴肅警告冇靈魂政府,老鼠一隻都嫌多!好似當年沙士咁,夠話死一個病人都嫌多喇!結果死咗近三百人!呢,明年鼠年,堪輿學家話鼠患問題不可掉以輕心,加上卦象屬水火相沖格局,「太歲當頭坐,無災也有禍」,官僚咪以為捉多咗老鼠就鬆毛鬆翼,若然有乜閃失,流感鼠疫接踵來,睇你哋屆時掘定窿都匿唔切!