笑看天下:司底驊繼續失蹤係好事-施友朋 評論員

2019年12月05日 00:04
東網電視
更多新聞短片
民望長期「墊司底」、有「避政司司長」之稱嘅律政司司長鄭若驊,上任以來醜聞纏身,佢自上月喺英國倫敦公幹時,遭示威者包圍,並於混亂中被人從後推倒而不幸趴街,導致左手腕脫骹兼骨折;惟做咗「獨臂神尼」後,其行蹤就好似人海中嘅「失蹤少女」,一直成謎!
作為特區政府法律界嘅第一號人物,趴街跌脫骹兼骨折,又唔係乜婦女暗病,使唔使咁神秘,喺宇宙茫茫人海中,好似一粒彗星咁消失吖?作為咁重要嘅問責高官,而香港正當多事之秋,你不安分留守香港,處理排山倒海般待檢控嘅案件,喺咁動盪嘅時勢,你竟然「出走」,仲要好似人間蒸發咁款!
喂!據說連律政司內部都無人知司底驊行蹤,唔通佢卜到支卦叫佢「潛龍勿用」?要學會「忍」,忍到咁上下,即使不是百忍成金,說不定就「利見大人」?呢,都幾好笑㗎!神隱大半個月,直至日前突然「出山」,忽然話要在機場見記者,而早日林鄭依然諱莫如深,以「私隱」為由拒絕透露鄭若驊是否在港!
唉!估唔到「猜猜我是誰」依家又有新橋「估估我在哪」!「獨臂神尼」在記者會終於揭開其消失在地平線嘅神秘面紗啦!哦!原來係多得祖國恩寵,被中國駐倫敦大使館將佢送到北京,其實你去「我們國家的首都」北京進一步檢查及治療,絕對係光榮!有國家嘅關心和愛護,又何必咁鬼祟要玩「失蹤」?
放病假咪放病假咯!反正各律政專員可按獲授權力履行相關嘅職責,你喺「我們國家的首都」長期休養生息,等骨骼恢復強壯,力能挽弓三百斤先返嚟都未遲㗎!反正糧照出,而檢控工作說不定少了甩轆添!老朽諗起漢奸黎涉刑恐本報記者一案,一拖逾兩年,答本報及受害記者第十六封信時,甚至上下段對調就叫「回覆」,乃知佢繼續玩失蹤其實係好事,起碼不必眼冤也。