功夫茶:教育亂象敲警鐘 莫再做騷不作為
國家主席習近平讚美澳門回歸二十年成就令中央自豪,並以「小桌面上都可唱出精彩大戲」形容澳門現況,其中一項最令習主席心花怒放嘅,相信係佢對澳門青少年愛國教育成功嘅肯定,鞏固了「一國兩制」,令愛國主義精神薪火相傳也。
嗱!相對於香港,回歸二十二年來「一國兩制」變形走樣,反中亂港成為主旋律,一場反修例風暴,更凸顯林鄭及其管治班子嘅碌碌無能,其中令人深感憂慮嘅係,無論大學或中學都變得政治化,竟然連一張書桌也放不下!大家都見到,黑暴持續逾半年,警方拘捕數字至今已逾六千人,有近四成即約二千四百人為學生,其中有約一千人為十八歲以下嘅中學生,你話香港教育唔係出咗大問題,三歲豆?都唔信喇!
尋日教育局局長楊潤雄見記者,指反修例風暴以來,至今已有八十名教師或教學助理被捕。自六月起至十一月底,局方接獲一百二十三宗與近期社會事件有關教師專業操守嘅投訴,大部分涉散播仇恨言論,已初步完成審視七十四宗個案,並先後向五名教師發譴責信,向一名教師發警告信,另外向七人發勸喻信,仲有三十一宗待跟進。
楊潤雄局長「忽然有所作為」,話教師一言一行會影響學生及社會將來,故即使個案輕微,教育局亦會嚴肅跟進,若情節嚴重,一經證實或考慮取消有關教師嘅註冊。今時今日教育亂象紛呈,上樑不正下樑歪,教育局依家先嚟「嚴肅跟進」,實在難逃失職之咎!呢啲唔係平時不燒香,急來抱佛腳係咩?
今年九月開學以來,許多中學嘅開學禮,功夫茶在螢幕上都見到學生冇規冇矩,禮堂上唔唱國歌改唱黃歌;在校園築人鏈,喪呼「光復香港,時代革命」;近期又有學生在校園附近,穿着校服堵路阻市民返工,而身為校長、老師嘅見到竟沒有阻止,甚至有教師加入堵路。教不嚴,師之惰,學生視校規紀律如無物,教師管都唔管,這不是咄咄怪事嗎?更令人不解嘅係,教育局諸君,竟然也無動於衷!好喇!眼見咁多教師違法違紀,依家先向學校、家長發信,係唔係遲咗啲?係唔係失職?係唔係應該問責?
喂!教師若不再「傳道授業解惑」,反而煽動仇恨,冇咗道德底線,欠缺人格尊嚴,又點會可親可敬?回歸以來,教育大倒退,政府每年花近千億元經費在教育上,結果教出滿街暴徒,這不諷刺嗎?楊潤雄局長依家急起「補牢」,雖然遲咗,都好過翹埋雙手。為官避事平生恥啊!教育畢竟係百年大計,少年強則國家強,功夫茶嚴肅警告楊局長:要真正作為才可救孩子,咪又係臨急做一做騷關人隱事吖!