功夫茶:欲止暴必利其器 買電槍好過水馬

2020年01月16日 00:03
東網電視
更多新聞短片
工欲善其事,必先利其器。此乃客觀事實,不必質疑。讀者如果不是善忘,早幾日功夫茶先至指出保安局為警方撥款多咗六千幾萬個大洋解畫,稱因應近排多公眾活動,加強保安要多添置水馬。
功夫茶第一時間力斥其非,話購水馬不如貼符,止暴豈可以示弱!嗱,有消息指警方擬引入電槍供日常警務之用。尋日保安局局長李家超喺立法會上雖不置可否,但就話會支持任何可以令警方更有效處理暴徒,而又可以降低大家受傷風險嘅方法。買電槍梗好過添置水馬啦,你話暴徒驚電槍多啲定係怕水馬多啲?阿哥,三歲BB都知答案啦!
黑暴衝突逾半年,暴徒裝備都愈來愈先進,防毒面具既鮮艷奪目又抵擋得住催淚煙,自製弓箭、漆彈、射擊鋼珠,甚至擁有氣槍野戰所使用嘅避彈衣等,你話如果警方唔提升裝備,直頭係落後於形勢。呢,警方接連破獲武器庫及土製炸彈廠,就知暴徒幾咁猖狂。再講啊,僅多添置水馬就想止暴制亂?盞笑大人個口吖!先前警務處已為警務人員加配裝備,包括向休班警務人員發放伸縮警棍,等佢哋唔使一有依郁淨係揸住碌竹!
嗱!家陣初步研究引入電槍供日常警務之用,唔單止用於防暴,料先由衝鋒隊使用,其後再逐步擴至其他部隊。消息指,電槍嘅威力級別定位,將建議高於警棍,並低於實彈槍。現時,英國、美國、澳洲及新加坡等多個國家或地區都有採用電槍,根據其中一個美國品牌嘅型號,其嚴重受傷或死亡率為每一百萬人約有十三點一人。反對派政客呱呱叫,話外國有事例顯示,警員使用電槍或會令被電擊者心臟病發,甚至死亡。阿哥,有心臟病咯,若然好似「AV仁」經常咁𥄫水着女,不必電擊,都一樣心臟病發猝死啦!政客未免杞人憂天,擔心吓自己食得多毒蘋果腦麻痹仲實際啲啦!
孫子話過,兵者,國之大事,死生之地,存亡之道,不可不察也。所謂「死生之地,存亡之道」,其實已有敬畏心,不會濫害無辜。功夫茶覺得,既然美國貨嘅電槍型號,傷亡率同中六合彩頭獎不遑多讓,呢個「美國標準」,反對派議員冇奶油唔接受啫!反對派乜都盲反一餐,如果唔係身有屎,使乜驚喎!
美國佬打敗恐怖組織,靠嘅係精良裝備。沒有鍋嘅廚師炒不了菜,當年美國獵殺恐怖大亨拉登,靠嘅係海豹突擊隊,佢哋嘅裝備精良,世界一流,據講淨係訂製版來福槍加上去嘅消光消音器都過萬美金。所以話,要止暴,警察豈能不加強裝備。功夫茶認同警察買電槍。要制亂,唔通用水槍咩!依家暴徒連水炮車都當冇到喇!