功夫茶:一哥一夫當關 正氣擊退群魔

2020年01月17日 00:03
東網電視
更多新聞短片
新任「一哥」鄧炳強上任以來,為警隊帶來一股新氣象,止暴固然精於部署,至叻智破幕後黑手,一改以前只驅趕不圍捕而壯大黑衣人個膽;另外值得一讚嘅係新一哥凡事親力親為,除了一日走幾場為前線警察打氣外,更深知肩負艱巨重任,一改前一哥「沉默是金」嘅作風,尋日佢親身走入反對派為首嘅中西區區議會回應,幫警方澄清,批評假新聞,不容無理抹黑警方但接受善意批評。
嗱!先聖就話「自反而縮,雖千萬人吾往矣」,意思係話若然自我反省,覺得有理有據,無愧於良心,咁即使面對千軍萬馬、千萬群眾,自己也要勇往直前。喺會上,一哥多次受到支持黑暴嘅區議員無理謾罵同埋攻擊,其中有區議員七情上面,拿出一塊「生豬肉」,話代街坊轉交,仲話年輕人上街被拉到警署最怕被「砌生豬肉」云云。亦有區議員懶醒稱自己戴上面罩係「暴徒」,完全唔知醜字點寫。
好個一哥,氣定神閒,口舌便給,佢對嗰位做騷、聲大夾冇準嘅區議員話,你戴面具而無暴力行動,唔算暴徒,要有行動才算,窒到條友口啞啞,好嘢!一哥又叫班友指控要講證據,唔好惡意亂噏,班友又當堂窒咗。一哥一臉正氣,剛柔並濟,拿捏得恰到好處,此誠金石可穿,鬼神可鑑,豈怕議會妖風大盛,群魔亂舞!
有道是「君子不恃萬人之諛頌,而畏一二有識之竊笑」。嗱!對住擦鞋仔諸多奉承,有作為嘅人點會受落而得意?反而有真知灼見者嘅譏笑,有識之士就會感到不安。喺回應反對派、反智者質疑警方引入電槍會「殺人」嘅問題,一哥答得情理交融,佢指電槍更有效率更安全,亦即功夫茶強調嘅止暴要利其器也。一哥話,當情況不容出動真槍但又需要開槍,用電槍就多個選擇,可減低武力層次。咁又係呀,之前暴亂,於千鈞一髮之間,電光火石之際,警員為自保及考慮到公眾安全,迫不得已開真槍引來唔少批評,如果開電槍,就可減少爭議。一哥此番陳詞,充分說明一個帶勇之人,除了膽識,更要強於分析!
是非不分,又唔講氣節仁義,社會梗亂喇!今一哥一夫當關,萬夫莫開,令人刮目相看。呢!會上鄧炳強被問及會否辭職或下台時,一哥話自己不是問責官員,不會問責下台。喂,人稱「避政司司長」嘅鄭若驊,霸住茅坑不拉矢都未問責下台,講下台,由中環排到柴灣都未輪到佢喇!
一哥形容自己嘅工作係理直氣壯,警隊清者自清,只有懼怕正義嘅人先至希望佢辭職!呢份自信,的確令人欣賞。有啲人得把口「苟利國家生死以,豈因禍福避趨之」,哪及得全力以赴、事必躬親嘅警隊一哥,功夫茶畀個like佢!