功夫茶:隔着口罩說愛你 亂世求生靠面紙

2020年02月15日 00:03
東網電視
更多新聞短片
愛在肺炎蔓延時,剛過去的情人節有人快樂有人愁。一花一世界,一葉一如來,一罩一情癡,隔着口罩說愛你,原來別有天地非人間!功夫茶講緊情人節除了應景嘅口罩花,最過癮嘅莫如炫富Bra!看官,這玩意就是你的愛人一對豐奶也戴上用口罩製成嘅Bra,在情人節給你一個意外嘅驚喜!
隔着口罩同好深嘅事業線說愛你,這比維多利亞秘密情趣睡衣更具震撼效果!管它天地惡菌飛,就這樣──愛情會一直沒有距離,愈吻不會愈傷心,係愈快樂吖,我的打令!愛在瘟疫蔓延時,情人節最佳禮物,不是玫瑰花不是名牌包包甚至美鑽閃生輝,係口罩包包,加支搓手液、一卷廁紙,寓意永遠保護你,牽「紙」之手與「紙」偕老又可搓手仔,溫馨到吖!
呢,講開一罩難求,有個人護理連鎖店網上接受實名登記買口罩,最高峰輪候人數竟達一百四十九萬人次!阿哥,港人活着的意義,彷彿就是每日為撲口罩!而廢柴政府連派發一個口罩給老人家都做唔到,難怪迎風冒雨,由凌晨排隊才買到口罩嘅婆婆,內心歡喜卻也忍唔住大喝一聲:林鄭你究竟喺度搞乜嘢?你瞓醒未啊?
嗱,既然一罩難求,「好打得」嘅林鄭日前都話政府全球採購口罩工作面對好大困難,仲話供政府人員工作時使用嘅口罩好快就會清倉;佢更透露國務院港澳辦在過去一個月,順利將一千七百萬個口罩運送到香港,佢又唔知為何總係開口必然夾着脷,口窒窒講咗一萬七千個!跟住尷尷尬尬話,如果市民知道採購途徑又方便嘅話,可以同政府「單一聲」喎!喺一罩難求下講啲咁嘅「廢腑之言」,有乜可能唔畀人頂佢個肺插佢雙眼兼㷫過火屎問候佢娘親吖?
廢官買罩無能,自身泥菩薩過江,靠呢個「正苦」不如靠自己。呢,港大深圳醫院與消委會等工作小組,教大家以透明膠套作為面罩,配以一張面紙巾,再加兩張廚房紙作為外層而自製口罩。自製口罩根據醫護口罩嘅三重設計,即面層防水、中層過濾、底層吸水嘅原理;而中層過濾可用廚房紙,底層吸水可用袋裝或盒裝三層或四層面紙。戴上後如口罩內嘅紙巾已濕潤,就要馬上換。
各位街坊,呢個自家製防護口罩,絕對比廢柴政府靠把口防疫實際,經專家試驗,對二十至二百nm氣溶膠微粒嘅過濾功能,達到外科口罩九成以上效果。記住,亂世求生靠面「紙」,一罩DIY倍自豪!聽朝早啲去買面紙和廚房紙啦喂,否則畀人掃光又飲恨!