笑看天下:管教無能 愧為人師-施友朋 評論員

2020年06月19日 00:04
東網電視
更多新聞短片
數字會講話,香港教育大崩壞!教育局局長楊潤雄日前指出,自去年六月至今年五月,因涉及社會事件被捕人士中,分別約有十名專上院校及一百名中小學教職員,暫未有被取消註冊個案。治亂世而不用重典,難怪止暴制亂至今仍然得個「吉」!另一數字係,被捕者當中,有成二千人為專上院校學生,另外約一千六百人為十八歲以下,相信大部分係中學生,更有數名小學生!即係由小學到大學,都有學生走出街頭反政府反社會,尤其咁多專上院校學生,香港大專教育之爛透可想而知!
事實上,中學生不安於課室而走出街頭嘅現象,明顯有增加迹象,老朽相信被捕教師及學生數字,不過係冰山一角。依家連中學生都知道「反中亂港打橫行,愛國愛港就折騰」!喺一個老鼠惡過貓嘅時代,學生仲惡過老師,副校長都要靠邊站,教育又點可能會好吖!
話說深水埗英華書院周一早上十一時左右小息時,有數十名學生喺操場唱《願榮光歸香港》,又高呼「光復香港,時代革命」、「香港獨立,唯一出路」等口號。該校小學部有家長致函校長,指從兒子口中得悉有中學生喺小息期間公然聚集宣揚港獨;亦有家長就此事致電副校長,但副校長就話,若學生行為過火會通知家長,並不會以高壓或嚴厲方式處罰學生。
一個月入成十萬銀嘅副校長仲向家長直認,學生喊口號時,老師就在附近,佢坦言學生喊口號是難以制止,而這是社會事件,學校既是受害者,亦無能力處理。
深水埗英華書院網上資料顯示係一間直資男校,以英文為主要教學語言,估計屬Band1B,點都算該區名校啩?但副校長竟然鵪鶉成咁,一個教師連管教學生出位嘅行為都無能為力,可以推算,根本亦無可能贏取學生嘅敬重。管教無能,愧為人師。姑息縱容學生,唔通相信佢哋未來人生會更精彩?