功夫茶:同是押後選舉 英美何其虛偽

2020年08月02日 00:04
東網電視
更多新聞短片
香港疫情嚴峻係不爭嘅事實,截至尋日已連續第十一日單日破百,且絕大多數為本地確診,而死亡人數更直線飆升,累計已超過三十人死亡!港府以疫情兇險,引用《緊急法》押後立法會選舉一年,都唔係冇道理嘅!
嗱!林鄭就話押後選舉係抗疫七個月以來「最艱難嘅決定」,又煞有介事指出着眼點「只有疫情,不涉政治」。講真,凡涉及選舉必政治化,尤其香港嘅政治生態如此畸形同撕裂,特區政府稍有風吹草動,必惹來反對派諸多詮釋,這是無可能改變嘅事實。
之不過,有研究亦指出,由二月二十一日至七月二十六日期間,至少六十八個國家或地區因疫情嚴峻而押後選舉,同時亦有至少四十九個國家或地區,繼續舉行選舉投票,其中至少三十一個國家和地區已舉行咗全國選舉或公民投票。是否如期選舉或因疫情而押後,並沒有甚麼主流意見,而係各國有各自難唸的經,自己執生最實際。
呢!美國總統特朗普早幾日都提出延遲今年十一月大選嘅可能性,佢喺社交網發文批評疫情期間郵寄投票不可靠,有機會帶來舞弊!有關言論立刻引來輿論嘩然及圍剿,共和黨黨友更紛紛割席,該黨參議院領袖麥康奈爾甚至表示:「就算經歷戰爭及經濟衰退,美國仍如期舉行大選!」特朗普想押後大選,必須經國會兩院多數議員批准,這根本難於上青天,講吓都有罪!
不過,西方向來雙重標準,特朗普自己都想押後大選,只是美國規例不容許,只好死死氣地褪軚辯稱「自己不希望押後大選」,政客信得過,豬乸會上樹,真係一啲都冇錯!隨後更透過白宮發言人指香港押後立法會選舉,係破壞香港賴以繁榮嘅民主進程及自由,係違背《中英聯合聲明》喎!阿哥,香港係中國嘅香港,基於疫情押後一年實無可厚非,正一吹皺一池春水,干卿底事?
英國喺三月都因應疫情而修例,以押後原定五月舉行嘅全國地方選舉一年。哈,點知英國竟然忍不住寂寞,外交部又發聲明指中國政府需令香港人民及世界釋疑,盡快舉行立法會選舉,唔應該以新冠肺炎疫情為藉口,進一步破壞香港嘅自治。美、英兩國,對香港押後選舉說三道四,充分反映其龍門亂搬和虛偽!
香港押後選舉有其必要,但正如有論者指出,既然押後,屆時報名又從頭來過,依家又何必多此一舉,硬要大搞跟民意作對嘅DQ騷?畀位「外國勢力」話係「政治打壓」!政府係都要搬舊大石砸自己腳咁戇居?古人說:安而不忘危,存而不忘亡,治而不忘亂。一眾庸官朽木,國家正多事之秋,唔該少懵炳一陣當幫忙喇!