功夫茶:空置稅臨陣縮沙 不撤辣玩死樓市

2020年10月18日 00:03
東網電視
更多新聞短片
俗語話有毛有翼就會飛,但有暴有疫就插翼難飛,香港經濟受雙重打擊,仲有花旗國話制裁,雖然未出真正「辣」招,但都嚇得吓人,唔係某些人死撐話影響唔大。
美國佬對香港仲未使出攞命「辣」招,反而係本港政府對自己人出招先,之前有殺傷力極大的樓市辣招,之後又宣布將推出一手樓「空置稅」,呢招據講是為了打擊囤積居奇喎。暫且唔講其可能影響性先,起碼睇到政府似乎想做啲嘢,但係大家又畀佢哋呃到喇,政府前日通知立法會內務委員會,將考慮暫停審議兩項草案,包括俗稱「空置稅」的《二○一九年差餉(修訂)條例草案》。財經事務及庫務局局長許正宇尋日被問到是否向地產商「跪低」,就死撐香港地小人多是恒久的結構性問題,政府仍有魄力處理土地問題。
崩口人忌崩口碗,虧佬幾時會承認自己性無能,突然抽起空置稅,政府梗係有難言之隱啦!啞子吃黃連,有苦自己知,面對就嚟到口嘅肥肉,收多一重稅項,政府照理由唔會放過,就好似豬八戒未跟唐三藏之前,作惡多端,強娶民女,唔會突然縮沙,除非出現攔路嘅齊天大聖。睇嚟政府呢鋪都係知衰,知道推出空置稅嘅後果承受不起。臨陣退縮係樣衰,不過呢班官員咁厚顏,都慣晒喇。
許正宇大耍官腔,話任何政策都是從公共財政的宏觀角度及經濟長遠發展為考慮,目標是盡快恢復經濟活力。最後呢句唔講猶自可,講咗就令功夫茶激起三把火,要恢復經濟活力,本報新聞同專欄都講好多次,最快靚正又平,梗係取消辣招啦,樓市係經濟大動脈,與好多行業息息相關,樓市活則經濟活,樓市畀乜嘢BSD、DSD綁住,其實就係「死快D」。
許局長說話中透露玄機,話政府面對財赤要「睇餸食飯」,相信不能再全民派錢,與其派錢倒不如審視如何「做大個餅」,發展有需求嘅新興投資產品,咁即係叫大家科水啦。經濟唔掂,九月份發出破產令及清盤令宗數按月飆逾五成,創四年新高,預計破產數字持續上升,大把人就嚟冇工開要乞食,政府仲要喺乞兒兜揦飯食,證明無能力開源,所以對樓市辣招的收入點都唔放過,你以為真係為民請命,遏抑樓價咩,咪傻啦!
其實各行各業萎縮,國泰部署大裁員,薪高糧厚嘅飛機師都有機會失業,仲搵邊個去供樓?再加上政治環境,美國制裁,資金流失,啲樓又點炒得起?分分鐘要托市添。辣招已經完成歷史任務,依家對經濟有害無益,政府應該從善如流,取消辣招,救人又救自己。若果執迷不悟,計功夫茶話齋,政府才是真正炒家,不過係攬炒嘅炒!