笑看天下:冇得飛係自己太衰-施友朋 評論員

20201023
東網電視
更多新聞短片
夜深風竹敲秋韻,萬葉千聲皆是恨。唉!要倒下來的始終會倒下,有七十多年歷史嘅國泰航空,即使早前獲港府充當「白武士」注資二百七十三億元打救,同時獲批近七億元首期保就業工資補貼,奈何因長期管理不善而在全球最佳航空公司排名每況愈下、早已病人膏肓嘅國泰,終於印證「國泰航空,愈做愈燶」這八字真言!
國泰日前展開史上最狠「大屠殺」重組方案,炒近六千名員工,同時即日停運擁有三十五年歷史嘅國泰港龍。阿哥,再冇機會畀你呻搭錯國泰機、唔知幾時飛咯!國泰重組求存,但面對疫情大環境,加上管理不善,一直蝕到流血不止,想鳳凰涅槃浴火重生,你估咁易咩!
大裁員之後,預料明年每月可減少五億元現金支出;之但係唔好忘記,國泰現時每月仍要消耗十五至二十億元現金,所以即使每月慳到五億元,仍然有成個黑洞要填!依家全世界仍然在新冠肺炎巨大陰霾下,航空業要復甦,據估計最快都要四年後!國泰明年六月要向政府償還首筆三厘息,業界憂慮是次大裁員究竟能幫到國泰幾多?消息指該筆注資只能幫國泰捱多兩年半左右,而廢官除咗扮難過,又話無再注資嘅意向!梗係冇意向喇,仲畀人鬧得少咩?
國泰令五千多人打爛飯碗,幸存者即使大削薪,短期內航空業肯定難以復甦,再一輪裁員並不出奇!有議員直言不相信國泰有能力償還政府嘅注資,恐怕成為庫房壞帳,財爺當時死撐注資屬「有合理投資回報」,看來又成笑話!國泰不務正業,這些年政治邪毒入侵,加上管理層烏啄啄,店大欺客,被指服務質素衰過廉航,由「起高樓」到「樓塌了」,其實都有迹可尋!正如本報「正論」一語中的:這間國際排名愈墮愈後的航空公司早就百病叢生,疫情不過是壓垮駱駝的最後一根稻草罷了。優勝劣敗,冇得飛只能怨自己太衰!