笑看天下:交足功課 更要慎獨-施友朋 評論員

2020年11月23日 00:04
東網電視
更多新聞短片
特首林鄭月娥將於周三到立法會發表新一份施政報告,現時香港內外交困,尤其新冠肺炎疫情出現第4波,經濟凋敝,民生多艱,呢份延後嘅施政報告會否有驚喜?老朽並沒有奢望會有甚麼惠及長者嘅福利,皆因兩蚊乘車優惠普及至60歲以上,政府都咁多嘢講,哀莫大於心死!
之不過,今次發表施政報告是首次冇泛民主派議員在席,幾可肯定,林鄭發言將不會被打斷,必然愈讀愈興奮,而主席梁君彥心情必定大靚,起碼不必3分鐘一小嗌、10分鐘一大呼喝止泛民議員叫囂,否則將視作行為不檢點而要逐出議事堂,是以氣氛和諧,老朽相信佢不會再「煩躁不安,精神受創」!
現時眾弦俱寂,有論者認為已冇乜亮點,如此更考驗建制派議員嘅智慧,譬如致謝動議表態,建制派會否選擇與政府保持「安全距離」甚至展現識見?聽說有建制派人士都認為呢個傳統乃承襲自英國議會,因此應該修改「致謝」字眼,換上其他較為中性嘅形容詞。老朽亦認為行政長官執政為民,用心盡力是理所當然,佢亦高薪厚酬,並非白做,不必「致謝」咁大陣仗!何況佢決策錯咗,全民埋單,整個問責班子也冇人會減薪甚至人頭落地。
建制派要改變向來予人「投票機器」嘅印象,就必須有所作為,正如有人指出,建制派議員要調整心態,適應立法會從喧囂走向沉靜嘅變化,認真審議政府嘅每一項議案;走到基層,聆聽街坊嘅各種訴求;發現問題,糾正錯誤,彌補疏漏,提出建設性嘅意見,以事實回擊一些人對建制派議員「橡皮圖章」嘅譏諷。而曾是過來人嘅王國興,提到議員必須用實際政績交功課,尤其要「慎獨」,絕不可以在任何會議廳處理私務,要嚴肅莊重,時刻抱戒懼之心,永遠謙虛地記住議員係坐喺放大鏡和顯微鏡下受到公眾監督,旨哉斯言!