笑看天下:救市無能 玷污科學-施友朋 評論員

2021年01月15日 00:04
東網電視
更多新聞短片
本地第4波疫情持續嚴峻,疫廈、屋邨爆疫愈爆愈有,而且舊區多樓齡逾40、50年,喉管失修,最近便頻頻出事!呢,佐敦新填地街唐樓出現多宗確診,專家批評當局未有及早擴大新填地街唐樓嘅強檢範圍,擔心區內會出現更多確診個案,最終導致疫情「V形反彈」。
據測量專家視察後發現,新填地街26號收集洗手間用水廢水管,以及收集坐廁用水嘅污水管連接同一喉管,擔心會令污水管嘅氣體經廢水管傳至住戶,令病毒傳播風險大增。屋宇署其後視察,發現包括大廈廢水管並未按《建築物規例》設置可防止水封流失嘅隔氣彎管而直接駁至便溺水管,部分單位嘅坐廁隔氣彎管冇按規例接駁反虹吸管。屋宇署就話會向業主發出渠務修葺令,要求糾正欠妥之處!
唔爆疫啲喉管10世都冇人會去理,迨至死人冧樓出事,先至會去「正視」,反映有關部門從來不知何謂「為之於未有,治之於未亂」!好多嘢,唔係要等到禍亂產生先至去做,要踢一踢先識郁一郁,做得嚟蛇都死喇!其實全港有咁多陳年舊樓,政府應定期去巡查啲污水管、廢水管有冇亂駁、銹爛等問題,依家接二連三發現「環境播毒」嘅屋宇愈來愈多,就係平時唔做嘢之過!
最好笑係庸官一味收緊禁聚令,農曆新年活動幾乎全部叫停,花市冇,許願樹封,黃大仙上頭炷香及年初三拜車公,睇怕都要取消。庸官無能,獨沽一味收緊收緊再收緊!食衞局局長之前甚至話要規管市民在家嘅跨家庭聚會,又借專家過橋,話佢哋建議商場可否提早關門!阿姐,新年流流,不如索性宵禁吧!依家晚上6點後禁堂食,食肆已在吊鹽水,連商場都叫提早打烊,庸官嫌周街吉舖仲唔夠肅殺?一味禁聚令,又冇良策救市救民於水深火熱中,呢啲就係庸官口中每一步決定都基於「科學理據」?如此玷污科學,盞貽笑天下!