功夫茶:監倉羈押假難民 懲教幫政府解窘

2021年02月23日 00:03
東網電視
更多新聞短片
新一份財政預算案明天出爐,政府大呻財赤料係歷史新高,財爺預先話要「睇餸食飯」,即係落定閘:咪旨意政府會開倉「派糖」!最令大家激氣嘅係,無能政府善財難捨,冤枉甘心,用於假難民免遣返聲請嘅相關工作,一年多過一年,小數怕長計,近7個財政年度已狂燒掉60億個大洋,公帑咁燒法,根本就係無底深洞!
嗱!南亞兵團作奸犯科成為本港治安毒瘤,佢哋相當一部分為假難民,與黑幫狼狽為奸,形成不同山頭作奸犯科,尋仇械鬥,劫金舖、找換店,甚至連便利店、超市、油站都唔放過;至於南亞兵團涉及毒品案亦不絕如縷,佢哋膽正命平,為錢甘願充當本地黑幫嘅爛頭蟀,為香港淪為毒港增添助燃劑,儼然係香港治安嘅計時炸彈!
本報多年來鍥而不捨呼籲港府退出公約,或設立禁閉式難民營,斬斷假難民來港搵食誘因,杜絕佢哋不斷留港犯案打黑工!可惜言者諄諄,聽者藐藐。最近政府忽然「開竅」不再埋首沙堆!今年初擬將暫停運作嘅大潭峽懲教所用作羈留設施,負責羈留免遣返聲請嘅假難民。懲教署署長胡英明表示,大潭峽懲教所目前提供160個羈留額,投入服務後可增加羈留名額約三分之一,又形容呢次任務對署方係一種新挑戰!
講真,懲教幫政府解窘,可謂任重道遠!正如胡署長接受本報獨家專訪,指出懲教所有黑豹部隊英勇神武,隨時可以空降平亂,不致會出現「監獄風雲」!之不過,呢班假難民絕非善男信女,更由於語言、生活習慣唔同,以致種族歧視等問題常發生,以往亦經常發生打鬥事故;故此喺溝通上下工夫,署方特別聘請3至4名退休印巴籍人員作為橋樑,負責同佢哋聯絡溝通,令在囚人士得到開解。
此外,大潭峽懲教所用作羈留假難民,係本港首間試行嘅「智慧監獄」,呢,為減輕署方員工嘅工作量,該院所設置人工智能嘅閉路電視,能夠辨別自殺、打交及倒臥等動作,繼而作出警告。胡英明進一步指出,未來仲會新增測溫、計算人數和追蹤在囚人士功能,以往一些皮膚黝黑在囚人士打鬥,難以單憑影像搵出滋事分子,依家有面容識別,可憑電腦快速搜尋搗亂分子。懲教署嘅準備,真可謂「為之於未有,治之於未亂」,之不過,署方都唔敢擔保冇暴動。
事實上,政府要杜絕假難民呢個摧毀法治嘅毒瘤,一味羈留,冇錯點都有阻嚇作用,但無底洞咁燒錢,際此財赤高企,經濟凋敝,民生多艱,養狼狗咬心口始終係下下笨策!當務之急係退出公約並加快遣返假難民,釜底抽薪,香港才可見到真正青綠色,即庸官所謂潛藏嘅「無限生機」!否則一切有為法,必如夢幻泡影,講乜都係嘥氣!