笑看天下:預算案封面應係血紅色-施友朋 評論員

2021年02月23日 00:04
東網電視
更多新聞短片
新一份財政預算案明天出爐,財爺日前已表示喺經濟尚未恢復之際,政府須維持逆周期政策以發揮穩定作用,下年度會出現較大嘅赤字,為新一份預算案定下甚具挑戰嘅前設,並指喺現實生活中要「睇餸食飯」,難免令選擇有限;又披露今年預算案封面為青綠色,代表着對未來所懷抱的希望云云。
講來講去,就係叫大家唔好對新一份預算案寄予厚望,「睇餸食飯」仲有乜好嘢吖,最緊要心中對政府懷有希望,咁即使鹹魚白菜,都會覺得「好好味」!民生多艱,失業率創新高,政府仲一味叫大家「有講有笑,積極樂觀地面對」!貧賤夫妻百事哀,除了牛衣對泣,難道仲會熱烈地彈琴高興地擁吻?一貧如洗,真係唔知點有講有笑!高官個個薪高糧準,飽漢不知餓漢飢,仲要窮民對住石頭幻想成翡翠!
預算案封面用青綠色,高官仲要文藝一番,話代表對未來懷抱希望,認為經濟有起伏、財政豐儉也有周期,就如植物生長也有其規律,不管是小草或大樹,起點也只是小小的種子,但潛藏的卻是無限生機。一眾庸官飽食終日,無所用心,抗疫張弛無道,平衡經濟無方,喺海景辦公室一邊度屎橋,一邊「細數落花因坐久,緩尋芳草得歸遲」,又點會明白等一滴活水救命嘅「涸轍之鮒」嘅痛苦掙扎!庸官仲廢噏:援助冇得臨時,長遠又怕濫用,窮咩?申請綜援喇!政府扶貧全覆蓋,精準到位!
面對涼薄政府,蟻民無語問蒼天,望住青綠色封面嘅預算案,見到嘅唔係希望,係失望無助嚇到面青青!怎麼香港淨係養一班抗疫失敗,但知亂燒錢嘅庸官?小市民連一滴救命水都求不得,即使係小小種子,乾死咗,又點「潛藏無限生機」?要同市民共度時艱,庸官快削薪五成或下台問責啦!民怨如火,㷫到爆炸!施政無能令香港焦頭爛額,預算案封面應該係血紅色!